N0.815/2020-2021

Lawngtlai, Tomir thla ni 4, 2020: Mizoram sawrkar ruahmanna anga hmarchhak state dang - Assam, Manipur, Meghalaya leh Tripura-a tangkhang Lawngtlai District mi leh sa lo hawte chu Lawngtlaiah sawrkarin inkaihhruaina a siam anga fimkhur taka lo dawnsawn niin, Lawngtlaia sawrkar enkawl inkhung hranna (quarantine facility) buatsaih hrang hrangah tha taka khung hran an ni a. Vawiin May ni 4, 2020 tlai dar 5:30 thlenga khung hran hi mi 173 an ni.

Sawrkarin hun a hawn angin April ni 30, 2020 atang khan state danga tangkhangte hi an lo haw tan a. Mizoram an lo luh tirha ramria an lo chhinchhiah bakah, Lawngtlai an lo thlenin an chanchin kimchang lo chhinchhiahin, COVID-19 rapid test kit hmanga an hriselna dinhmun lo enfiah zel a ni a, chumi hnuah quarantine facility-ah dah luh nghal zel an ni a. Rapid test kit hmanga enfiahnaah hian chanchin duhawm lo nei an awm lo.

Lawngtlai District mi leh sa state dang atanga lo haw tur a tira hriat lawk hi mi 49 an awm a. Chumi ang chuan ruahmanna siam niin, beisei lawk aia tam an lo haw leh si avangin ruahman belh ngaite pawh tih zung zung a ni a, harsatna lian tham em em awm lovin a lo haw ang angte hi a nih tur ang taka lo dawnsawn an ni.

Lawngtlaiah hian quarantine facility hi hmun thumah ruahman a ni a. Medical quarters facility block paliah mi 98 dah niin, Circuit House-ah mi 47 leh Tourist Lodge-ah mi 28 dah an ni. He'ng quarantine facility-te vil tur hian nodal officer-te ruat an nih bakah, a tul dang thawk tur leh venhimna lam thawk turte ruat an ni a. Khung hrante ei leh in leh mamawh zual dang chu sawrkarin ngaihtuahsakin, chaw pek leh tul danga pui turin Govt Lawngtlai College leh Govt Region Higher Secondary School NSS (National Service Scheme) volunteer-te an duty bawk.