1545/2025-2026

Lawngtlai, 7th August, 2025 : Vawiin khan 'Lawngtlai District Monitoring Committee for Bana Kaih' chuan DC Conference Hall- ah thutkhawm an nei a. Pu Cheemala Siva Gopal Reddy, IAS, Deputy Commissioner leh Chairman,  Lawngtlai District Monitoring Committee for Bana Kaih' nibawk chuan thutkhawm hi a kaihruai.

Pu Cheemala Siva Gopal Reddy chuan Member kalkhawmte hnena lawmthu sawina a nei a. Mizoram Sawrkarin a ngaihpawimawh leh chak taka a kalpui mek  Bana Kaih tihlawhtling turin Progress Partners- te bakah a viltu tur District Monitoring Committee - te an pawimawh hle a ti a. Tun dinhmunah  Lawngtlai District- ah Progress Partners- 82 leh Line department- 6 an awm mek tih tarlangin, hmalakna chak taka kalpui mek zel a ni, a ti. Bawrhsap chuan District Monitoring Committee Members -te chu an mawhphurhna a chiang tur leh hlawhtling taka Bana Kaih kalpui a nih theih nan a  theihtawp chhuah chhunzawm zel turin a chah.

Sum leh pai dawn emaw hmuh duh vang ringawta Beneficiary List- a awm  pawh thil awm thei a nih thu sawiin, Bawrhsap chuan Progress Partners- te hnathawh leh hmalak dan chu chiang taka hriatpui a tul hle a ti a. A bik takin Line Department - a Officer- in - Charge, te chu a hmun ngei a kal a, Progress Partners- te hnathawh dan tlangpui, record bu an vawn fel dan leh tul dangte chu enfiaha, DC Office - a report thehlut thin turin a chah a. Sawrkar sum leh pai a thlawna sen ral a nih lohna tur leh a mamawhtuten a tak  hlawhtlinna an hmuh ngei theihna tura theihtawp chhuah fo turin District Monitoring Committee Members zawng zawngte a chah nghal bawk.

Thutkhawmah hian thil pawimawh tak tak sawiho a ni a. Lawngtlai District - a 'Bana Kaih'  hlawhtling taka kalpui a nih theih  nan District Monitoring Committee chu tam zawka thutkhawm thin ni se an ti a. Progress Partners - te hmalakna chu a hmunah ngei kal a vil thin nise, hlawhtlinna changtute pawh mipuite hmuh theih tura tarlan thin ni se tih a ni. Bana Kaih hnuaia Line department- te chuan theihtawp chhuah chhunzawm zel  se tiin an rel bawk.

Vawiin 'Lawngtlai District Monitoring Committee for Bana Kaih' thutkhawmah hian Member- te an tel kim tha hle a. Pu Cheemala Siva Gopal Reddy, Chairman, Lawngtlai District Monitoring Committee for Bana Kaih, chuan lawmthu sawina neiin hun a khar.