2617/2025-2026

Lawngtlai, 11th December 2025: Vawiin khan Lawngtlai District Narco Coordination (NCORD) Committee chuan DC Conferenc Hall-ah thutkhawm an nei a, Pu Donny Lalruatsanga Bawrhsap leh Committee Chairman nibawk chuan a kairhuai.

Pu Donny Lalruatsanga chuan committee member - te hnen a lawmthu sawina a nei hmasa a. Naupang thalai leh nu leh pa te ruihhlo laka an fihlim theih nan NCORD hian chanvo pawimawh tak a nei tih tarlangin, Committee Member - te mahni hnathawhnaa theihtawp chhuah turin a chah a. Ruihhlo man chauh niloin ruihhlo laka fihlim tura mipui fuih leh zirtirna kawngah theihtawp chhuah zel turin a sawm a. A bik takin 'Operation Jericho' tha tak a kalpui a ni thei chu lawmawm a tih thu tarlangin, thawktu zawng zawngte chungah lawmthu a sawi nghal a ni.

Pu PC Lalchunglura Sr. Superintendent of Police chuan report tawi pekna a nei a. Operation Jericho ah tha taka duty a nih thu sawiin, Awareness Campaign pawh chak taka kalpui a ni, a ti. Joint Operation - tha taka kalpui niin, Ni 2 November- ni 4 December inkarah Zu litre 14.25 man tawh a nih thu a tarlang bawk.

Thutkhawmah hian thu pawimawh tak tak sawiho a ni a. Operation Jericho - hnuaia sawrkar leh NGO- te ne inkara thawhhona tha tak awm chu chhunzawm zel ni se an ti a. Demand Reduction - lamah tan lak a ngai hle nia an hriat thu sawiin, hemi kawngah hian chak zawka hmalak ni se, an ti a ni. Operation Jericho- chu nakum lamah pawh chhunzawm leh ni se an ti bawk a ni. Vaihlo chungchangah Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) COTPA Act, 2003 chu chak zawka kalpui ni se, sawrkar Office - ah kalpui tan ni se an ti bawk a ni.

Vawiin thutkhawmah hian Lawngtlai District Narco Coordination (NCORD) Committee Member - te an tel kim tha hle a, Pu Donny Lalruatsanga chuan lawmthu sawina neiin hun a khar.