1322/2024-2025

Dated Lawngtlai, 25th July 2024 : Vawiin chawhnu dar 3:30 khan Lawngtlai District Petroleum Dealers- ten 'Joint Statement'  an chhuah chungchangah DC Conference Hall, Lawngtlaiah hmanhmawh taka thutkhawm neih a ni a. Pi B. Malsawmtluangi, Addl. DC chuan thutkhawm hi  kaihruaiin, Sawrkar Official, NGO leh Kohhran aiawh bakah   Lawngtlai District Petroleum Delaers- te an telkim tha hle a ni.

Pi B. Malsawmtluangi chuan kalkhawmte hnena lawmthu sawina nei hmasain, Lawngtlai District Petroleum Dealers - te thuchhuah chuan mipui nawlpui  ti chiaiin harsatna lian zawk a thlen thei dawn a, uluk taka ngiahtuahna senho a ngai a ni a ti . Lawngtlai District- ah mipuite tana hnianghnar taka tuialhthei a awm a pawimawh hle a, chutih rualin Myanmar lama kal tur ven pawh thil tul tak a ni, a ti a. Central Young Lai Association (CYLA) ten theihtawp chhuaha Arakan lama kal tur an lo endik thin chu a lawmawm hle tiin, Lawngtlai District chhunga thingtlang lam te hman tur dan palh kawngah erawh fimkhur a tul hle a ti.

Lawngtlai District Petroleum Dealers te chuan 'joint statement' an chhuah chhan sawifiahin OMC atanga 'Monthly Sales Target' nei an nih angin, Sales target -tlin turin tha taka  inhralhchhuah a tul hle an ti a. Duhsak taka dawr thintuten harsatna an tawk fo thin a, a bik takin thingtlang lam atanga dawrtute tan barrel emaw gallon hmanga lak a ngai thin a, harsatna an tawk nasa hle a ni, an ti a. Mipui mamawh (essential commodities ) phurtu an nih angin, zalen zawka an sumdawnna kalpui chu an duh ber a nih thu an tarlang a ni.

Central Young Lai Association (CYLA) hotute chuan Myanmar lama tuialhthei hralh a awm thin vanga duty an nih thu sawiin, petrol pump neitute emaw mipuite tana harsatna siam tum hrim hrim an nih loh thu an tarlang a. Zalen taka Myanmar lama tuialhthei phurhluh a nih hian Arakan Army -te  tha nasa taka tichakin chu chuan Myanmar lama kan unaute tan harsatna lian zawk a thlen thin a ni,  an ti a. Lawngtlai khawpui chhunga zalen taka Arakan mi leh sa  an lo lut thin pawh veiawm an tih thu sawiin, Lawngtlai khawpui a lo him zawk nan theihtawp chhuah an nih thu an tarlang a. Tuialhthhei phur motor Myanmar a lut ngei tura an hriat chiante chauh an dang thu sawiin, YLA duty te zingah che mawilo  an awm a nih pawhin tha taka an in zilh thin thu an sawi bawk.

Thutkhawmah hian Sawrkar official, NGO leh Kohhran aiawhte chuan Petroleum Dealers - te chu an thuchhuah sut turin an ngen a. Petroleum Dealers- te chuan an ngnenna zawhawm an tih rualin, AMPEDA ( All Mizoram Petroleum Delaers' Association)  hnuaia awm an nih angin, AMPEDA lamah thlena thutlukna an siam tur thu an sawi a. YLA ten petrol pump atanga petrol lak theih zat bituk siam tawh  lo tura ngenna awm pawh lungrual taka pawm a ni a. Petrol- la thinte zingah barrela la turte chuan Deputy Commissioner's Office atangin permit lak zel ni se, permit nei motor- te  chu CYLA duty ten dang loh nise an ti a. CYLA leh Petrol pump neitute pawhin a bik taka inkawmna lo nei se tiin an rel a ni.