November ni 28, 2018 khi Mizoram MLA Inthlanpui 2018 vote thlak ni a ni a. Tukin zingkar atang khan Lawngtlai District chhunga polling party-te chuan an duty-na tur polling station lam an pan tan.

Tukin khan Lawngtlai District-a assembly constituency pathuma EVM hman turte dahna strong room awmna Govt Lawngtlai College-ah polling station hla zuala duty tur polling party-te kal khawmin, an bungraw mamawh turte an lak khawma an EVM & VVPAT ken turte an enfiah leh vek hnuah an duty-na tur polling station theuh panin an kal chhuak a. Polling party-ah hian polling official-te bakah, security personnel leh driver-te pawh an tel.

Vawiina kal chhuakte hi polling station 59 awmna 36-Tuichawng (ST) Assembly Constituency-a duty tur polling party 59, polling station 68 awmna 37-Lawngtlai West (ST) Assembly Constituency-a duty tur polling party 32 leh polling station 34 awmna 38-Lawngtlai East (ST) Assembly Constituency-a duty tur polling party 13, an zavaiin party 104 an ni a. Hemi bak Lawngtlai West-a polling party 36 leh Lawngtlai East-a polling party 21 te chu naktuk hian an chhuak ve leh ang.

Vawiin hian Lawngtlai District-a sector 19-a Sector Officer thenkhat chu an chhuak ve nghal a. A hnai zual thenkhat erawh naktuk lamah an chhuak ve thung dawn a ni.