No.1222/2020-2020

Lawngtlai, Tomir thla ni 19, 2020: Lawngtlai District mi leh sa state pawn atanga lo haw Lawngtlaia sawrkar enkawl inkhung hranna (quarantine facility)-a khung hran zinga mi 10 chuan vawiin khan quarantine facility chhuahsan ve lehin, tun dinhmunah Lawngtlaia sawrkar quarantine facility-a khung hran mi 54 an la awm mek.

Vawiin khan haw runpui thawh khatnaa hmarchhak state atanga lo haw Lawngtlai District mi leh sa 183 khung hran zinga la chhuak bak mi 10 te chu anmahni khung hran hun bi a kim tawh avang leh an hriselna kawngah harsatna leh insawiselna an neih loh avangin quarantine facility atanga chhuahtir an ni ve leh ta a. Heti hian haw runpui thawh khatnaa lo haw mi 183 te chu quarantine facility atanga chhuak kim tawhin, anmahni in lamah ni 14 chhung an inkhung hran chhunzawm ve leh dawn a ni.

Hetih lai hian tun dinhmunah Lawngtlai District mi leh sa state pawna tangkhang sawrkara inhriattir, lo haw tura beisei mi 880 vel an la awm mek a. Sawrkarin a ruahman ang zela lo haw tur niin, anmahni lo dawnsawn dan tur pawh district thuneitute'n an ngaihtuah mek bawk.