No.1161/2020-2021

Lawngtlai, Tomir thla ni 17, 2020: Mizoram sawrkar ruahmannaa state pawn leh ram pawna Mizoram mi leh sa tangkhang lo hawte chu sawrkar enkawl inkhung hranna (quarantine facility)-a khung hran tura tih a nih anga Lawngtlai District chhunga quarantine facility-a khung hran tun dinhmunah mi 93 an la awm mek.

Vawiin thleng khan haw runpui thawh khatnaa hmarchhak state atanga lo haw Lawngtlai District mi leh sa 183 khung hran zinga mi 136 chu anmahni khung hran hun bi a kim tawh avang leh an hriselna kawngah harsatna leh insawiselna an neih loh avangin quarantine facility atanga chhuahtir an ni tawh a. A bak mi 47 te pawh naktuk hian chhuak thei tawh tura ngaih an ni. He'ng sawrkar enkawl inkhung hrannaa an inkhung hran hun bi (ni 14 chhung) hmang zo tawhte hi an chhuah hnuah pawh mahni in lamah ni 14 chhung la inkhung hran chhunzawm tur leh fimkhur taka an hriselna dinhmun thlithlai reng tura chah nghal an ni.

Hetih lai hian nimin khan Tamil Nadu atangin Lawngtlai District mi leh sa 46 te chuan Lawngtlai lo thlengin, quarantine facility-ah dah luh ve nghal an ni a. Tichuan, tuna Lawngtlai District chhunga sawrkar enkawl quarantine facility-a khung hran mek hi mi 93 an ni.