1309/2024-2025

Dated Lawngtlai, 25th July 2024 : Vawiin khan Lawnglai District Sports Committee chuan DC Conference Hall- ah thukhawm an nei a, Pi B. Malsawmtluangi, Addl. DC chuan thutkhawm hi a kaihruai.

Pi B. Malsawmtluangi chuan Sports Association aiawh lokalte lawmna thu a sawi hmasa a. Rilru leh taksa hriselna nei turin infiamna a pawimawh hle tiin infiamna lam uar zawka kalpui tura hmalak zel pawh a tul hle a ti. Infiamna 'discipline' hrang hrangte chu an pawimawh dan a in ang vek a ni tiin, mahni zawn theuhah theih tawp chhuah a tan lak zel a pawimawh hle a ni, a ti a. Lawngtlai District Sports Association hrang hrangte inkarah thawhhona tha a pawimawh hle tih tarlangin, lungrual leh induhsakna nena thawkho zel turin a chah a ni.

Pi B. Malsawmtluangi chuan Sports Association hrang hrangte hmalakna fak awm a tih thu sawiin, duh angin sum leh pai lamah in tanpui theih ni lo mah se; Sports Association hruaituten thahnemngai takin an thawk thin a, hei hian infiammite tan kawng hrang hrangin hmasawnna a thlen thin a, an chhuanawm tak zet a ni, a ti. Infiamna hrang hrang tih hmasawnna tur a  'Sports Promotional Fund' pek thin chu tha tak leh infiammite hmakhaw ngaia, hmasawnna tura hmang chhunzawm zel turin a chah nghal bawk.

Pu Samuel Lalmalsawma Sailo, SDC, Secretary , Lawngtlai District Sports Committee chuan report tawi pekna a nei a. Tun dinhmunah Sports Promotional Fund ah cheng 2,99,170 a awm mek a ti a. Sports Association hrang hrang hruaitute chu fund hmuh duh vang ngawt ni lo a, infiammite hmasawnna tura thawk chhun zawm turin a sawm nghal a ni.

Vawiin thutkhawmah hian Sports Association tanpuina dilte chung chang ngaihtuahho a ni a. Sports Promotion Fund  - atangin Lawngtlai District Football Association chu cheng 20,000 leh Lawngtlai District Rifle Association chu cheng 25,000 a tanpui ni se an ti a. Kum danga kalpui tawh thin angin, Independence Day lawmna pualin Football leh Badminton tournament huaihawt ni se, Republic Day - ah Volleyball leh Table Tennis tournament buatsaih thin nise an ti bawk.

Sports Promotional Fund dawng tur a Sports Association inziak lut 16- Football, Volleyball, Basketball, Taekwondo, Judo, Badminton, Table Tennis, Boxing, Chess, Aquatic, Carrom, Body Building & Fitness, Power Lifting, Rifle, Athletics, Racing an awm mek a ni.

Vawiin Lawngtlai District Sports Committee thutkhawmah hian Sports Association hrang hrang  hruaitute an telkim tha hle a, an hmalakna leh hlawhtlinna an chan kawng hrang hrangte ngaihthlakna hun neih a ni a. Pi B. Malsawmtluangi, Addl. DC chuan lawmthu sawina neiin thutkhawm hi a khar.