Economics & Statistics Department hnuaia Lawngtlai District Research Officer (DRO) office-in an buatsaih 'Statistical Handbook Lawngtlai District 2018' chu vawiin khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua'n Lawngtlai DRO Conference Hall-ah a tlangzarh.

Pu H. Biakzaua chuan Lawngtlai DRO office-in Lawngtlai District Statistical Handbook 2018 an puitlin thei chu lawmawm a tih thu leh lehkhabu tangkai tak a nih a beisei thu a sawi a. Lawngtlai District tihhmasawn nan department hrang hrangte'n phei khai rual taka hna an thawh tlan a tul thu sawiin, department hrang hrang tichangtlung tur leh la awm mumal lo te pawh dah thar zel a nih theih nana hma a lak zel tur thu a sawi a. Lawngtlai District chu Myanmar leh Bangladesh te nena ramri thui tak intawm, insi reng a nih avangin ram dang mite'n rawn luh nan an hman a remchang hle a, chu vang chuan piang leh thi chhinchhiah leh certificate pek chhuah chungchangah fimkhur a ngai hle tiin, a buaipuitu department leh magistrate te hma lak thin dan chu a fakawm hle rualin tan la zual deuh deuh se a duh thu a sawi.

Statistical Handbook tlangzarh inkhawm hi DRO Pi H. Chhunkungi'n kaihruaiin, inlawmna thu leh statistical handbook an buatsaih dan a sawi a. Khual zahawm, Lawngtlai Bawrhsap Pi Shashanka Ala, IAS chuan Lawngtlai District dinhmun fel taka chhinchhiah a ni chu lawmawm a tih thu sawiin, Statistical Handbook chu tihchangtlun chhoh zel a nih theih nan department hrang hrangte pawh anmahni kaihhnawih data te tha taka pe lut thin turin a chah.

He hunah hian Lawngtlaia sawrkar official te, department hrang hranga statistics nodal officer te, RBD (Registrar of Births & Deaths) te, kohhran hruaitu leh tlawmngai pawl ai awh te leh MLA tawiawmtu MNF party mi leh sate fuan khawmin, Lairam Isua Krista Baptist Kohhran (LIKBK) General Secretary Rev. B. Zazawna Lai pawhin thu a sawi.

Lawngtlai District Statistical Handbook 2018-ah hian kum 2011 chhiarpui atang te, Economics & Statistics Department-in Mizoram Statistical Handbook leh Village Survey a tihchhuah atang te leh Lawngtlaia state sawrkar department hrang hrang bakah, Lai Autonomous District Council (LADC), Chakma Autonomous District Council (CADC), bank leh kohhran atang tea data lak khawmte khung khawm a ni.