No.235/2020-2021

COVID-19 vanga inkharkhip laia Lawngtlai District chhung, a bik takin thlai tharlam hmuh zung zung tur a awm lohna Lawngtlai khawpui chhunga mipuite thlai thar leh sangha mamawh pe chhuak tura a lak khawm leh sem chhuah dan tur District Level Task Force hnuaia ruahman angin Horticulture leh Fisheries Department hma laknain District Supply Chain chu tluang taka kalpui zel a ni.

Vawiin khan a tum hnih nan Lawngtlai District Fisheries Department chuan Vaseikaia sangha dil siamtute sangha thar - nghasen (common carp) chu an hralh chhuak leh a. He'ng sangha an hralh chhuah hi a vaiin quintal 3 a ni a, a hmaa Bungtlang 'S' leh Chawngtea sangha dil siamtute sangha an lo lak tawh nen District Supply Chain hnuaia sangha hralh chhuah tawh zawng zawng hi quintal 8.90 a ni.

Lawngtlai Horticulture Division hnuaia thlai thar lak khawm leh hralh chhuah pawh tluang taka kalpui niin, Lawngtlai District chhunga thingtlang khaw hrang hrang - Ngengpuikai, Kawlchaw W, Chawntlangpui, Thingfal, Nalbonya, Sumsilui, Udalthana, Nghalimlui, Bualpui NG leh Vartekkai bakah, Lunglei District-a Khawmawi atang te'n thlai thar hi an phur khawm a. Tun thleng hian thlai thar trip 14 lak tawh niin, a vaiin quintal 210 bawr vel a ni a. A tul dan azira la lak belh zel tur paw'n ruahman a ni.

District supply chain hnuaiah hian inkharkhip chhung pawha Lawngtlai District mipuite'n ni tin khawsak nana an mamawh thil hrang hrang bakah, chaw tha mamawh ang an hmuh theih nan hma lak a ni a. Kut hna thawktute thei, thlai, sa leh sangha thar chhuahte chu a kaihhnawih department te'n mipuite tan an phurh khawmsak thin a, hei hi veng hrang hranga task force-te kal tlangin hralh chhuah thin a ni.