4249/2025-2026

Lawngtlai, 2nd February 2026: Vawiin chawhma dar 10: 00 AM khan Lawngtlai Bawrhsap leh Chairman ' Lawngtlai District TB Forum' nibawk Pu Donny Lalruatsanga kaihhruaiin DC Conference Hall - ah thutkhawm neih a ni.

Pu Donny Lalruatsanga chuan TB umbo turin Department pakhat chauh a tawk lo tiin, department zawng zawng, NGO,Kohhran leh mipuite nen thawhho thiam a pawimawh tak zet a ti a. Sawrkarin TB umbo turin National TB Elimination Programme (NTEP) kalpuiin TB Forum hial din a ni a, sawrkar hmalaknaah thahnem ngai taka thawh zel a tul hle a ni, a ti. Bawrhsap chuan District dangte nen tehkhinin, hmalakna tur a tam hle tih tarlangin, TB umbo kawngah tan lak thar a nih tur thu a sawi a.Inkalpawhna lama harsatna awm lo turin, TB umbo tura thingtlang lam atanga hmalak tan niin, khawpui lamah chhunzawm zel a ni ang a ti. Bawrhsap chuan khawvelin 2030 ah TB umbo a tum tih tarlangin, Lawngtlai District - ah pawh umbo a nih ngei theih nan theihtawp chhuahpui turin sawrkar department, NGO, Kohhran leh Lawngtlai mipuite a sawm nghal bawk.

Dr. Remlalnghaki, DTO, Lawngtlai District chuan power point presentation neiin, TB Mukt Bharat Abhiyan (TBMBA) Phase 2 kalpui dan tlangpui sawizauna a nei a. Phase - 1 chu 21st May - 31st December 2025 thleng khan kalpui tawh niin, TB vei Lawngtlai District- ah mi- 13 hmuhchhuah a ni, a ti. TBMBA Phase 2 chu February 2026 atanga kalpui tan tur a ni, a ti. High risk areas, vulnerable populations leh Congregate settings. - ah te campaign kalpui tur a ni ang.

Pu James Zarzoliana, Sr .TB Treatment Supervisor chuan NTEP ( National TB Elimination Programme) kalpui dan sawifiahna a nei a. Report 1st January - 31st December 2025 atanga a lan danin, Lawngtlai District- ah TB awmlohna khua a la awm lo a ni, a ti. Hemi hun chhung vek hian TB rinhlelh test - 1037 awmin, TB vei mi - 77 an awm a ni. Thla 13 kal chhung khan TB vei tihdam - 117 awmin, thi- 2 an awm thu a tarlang a ni. Pu Jacob J. Vanlalsawma, PPM Coordinator, chuan TB tihdamna kawnga sawrkarlaipui hmalakna Pradhan Mantri TB Mukt Bharat Abhiyan hnuaia 'Nikshay Mitra' sawizauna a nei bawk a ni.

Vawiin thutkhawmah hian Lawngtlai Distrcit TB Forum Member- te an tel kim tha hle a, Pu Donny Lalruatsanga chuan lawmthu sawina neiin hun a khar.