No.4189/2020-2021    

Lawngtlai, Thlazing ni 18, 2020: Kumin Higher Secondary School Leaving Certificate (HSSLC), 2020-a Commerce Stream-a Lawngtlai District atanga top ten-a lang mi pahnih chu vawiin khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua'n Lawngtlai DC Conference Hall-ah chawimawina leh lawmpuina a hlan.

Zirlai ti tha, chawimawina hlante hi HSSLC 2020 Commerce-a pahnihna (2nd rank) Lalrintluangi, d/o MC Lalrokhuma, Lawngtlai-III leh pangana (5th rank) Lalremruatmawia, s/o L. Lalthangzauva, Sangau-I te an ni a. Pu H. Biakzaua hian anmahni chawimawi nan leh a lawmpuizia lantir nan, an zir zelna kawnga an mamawh tur laptop computer a pe a ni.

Pu H. Biakzaua chuan zirna chu mihring chher puitling tura hmanraw tangkai ber a nih thu sawiin, sawrkar pawhin sikula zirna chu ngai pawimawhin, sum tam tak a dah tih a sawi a. Zirna kawnga theih tawp chhuaha bei thinte hlawhtlinna chu mi dang fuih phurtu leh entawn tur siamtu a nih avangin mi hlawhtlingte chuan chawimawi an phu a ni tiin, chu vanga chawimawina pawh buatsaih a nih thu a sawi a, Lawngtlai District atangin chawimawi tlak mi tam zawk lo chhuak se, a aia nasaa insen pawh a huam thu a sawi. Zirlaite hlawhtlinna chu anmahni tan mai ni lo va, ram tan pawh malsawmna a nih thu sawiin, Pu H. Biakzaua chuan mi thiam tamnaah ram hmasawnna a chak thin tih a sawi a. Zirna tluangpui zawh tawh hnua hna thawh tur ngaihven zui lo leh hna tha chuh ngam lo an tam lutuk chu lehkha thiam hna nei lo tipungtu nia a hriat thu sawiin, thiamna tak tak nei tura zir a pawimawh ang chiahin mahni thiamna hmang thei tura hna zawn peih pawh a pawimawh tel thu a sawi bawk.

He hun hi Lawngtlai Bawrhsap Dr Andrew H. Vanlaldika, MCS chuan kaihruaiin, Lawngtlai District-in chawimawi tlak zirlai chhuanawm a nei chu lawmawm a tih thu a sawi a. A bul tan that a pawimawh rualin, a tawp thlen loh a hlauhawm zawk tih sawiin, tuna an hlawhtlinna chu a bul tanna chauh a ni tih hria a, tumruhna petu leh anmahni nawr kaltua hmang turin hlawhtlinna chang zirlaite chu a fuih.

Vawiina Lawngtlai District atanga HSSLC topper-te chawimawina hunah hian chawimawina dawngtu zirlai chhungkua atang leh kal khawmte atangin lawm thu leh fuihna thu ngaihthlak a ni a. Samagra Shiksha, Lawngtlai District Dy DPC Pu H. Laltanpuia'n lawm thu sawiin, hun a khar a ni.