Vawiin khan Lawngtlai CYLA Hall-ah H&TE changtu Parliamentary Secretary Pu H. Zothangliana chuan Lawngtlai District Industries Centre (DIC) hnuaia NLUP 3rd Phase dawngtute hnenah tanpuina a sem. 

Pu H. Zothangliana chuan sawrkarin hlawhtlinpui tham NLUP tanpuina a sem tih sawiin, a dawng zingah lawm nachang hre lo leh a nih tur anga hmang lo an awm thin chu pawi a tih thu a sawi a. Hlawhtling tura theihtawp chhuah chu a dawngtute mawhphurhna a ni tiin, a hmaa lo hmang tha lo deuh tawhte pawhin tun tuma mi hi chu dik takin hmang se hlawhtlinpui tham a la nih tur thu a sawi. NLUP chu a la tawp mai dawn lo va, a tul angin sem zel a la nih tur thu sawiin, ram leh mipuite hmasawn nan NEDP hnuaiah hmasawnna ruhrel lian zawk duan a, kalpui chhoh mek a nih thu a sawi bawk. 

He hun hi Lawngtlai DIC-a Functional Manager Pu C. Dokulha'n a kaihruai a. LADC-a Art & Culture changtu Executive Member Pu L. Lawmkima leh NLUP-a thirden thlangtu Pu Kapsiama, R. Vanhne te pawhin thu sawiin, DIC-a Industrial Promotion Officer Pi Biakchungnungi'n lawm thu sawiin hun khar a ni. 

Vawiina sem tak Industries hnuaia NLUP 3rd Phase dawngtute hnena tanpuina hnuhnung ber (3rd instalment) hi trade 11 chhunga mi 223 hnenah pek a ni a. A sum faiin Rs 65,73,000/- (nuai sawmruk panga singsarih sangthum) sem chhuah a ni. 

He hunah hian Pu H. Zothangliana hi LADC atangin EM Pu L. Lawmkima, EM Pu C. Lallungmuana leh Deputy Chief Whip Pu ST Laldailova te bakah, Lai DCC-a hruaitu eng emaw zatin an tawiawm a ni.