Nimin khan Mizoram Upa Pawl, Lawngtlai Sub – headquarters chuan Lawngtlai Chandmari venga Jehova Jire English School ah Annual Assembly an hmang a, kum 2013 leh 2015 inkar chhunga Sub-headquarters hruaitu thar turte an thlang nghal bawk.

Nimin a Annual Assembly neihna ah hian palai thahnem tawk tak kal khawmin MUP Sub-headquarters hnuaia hmalakna hrangte leh sum leh pai lama an dinhmunte report pek a ni a, tuna MUP Recreation Center, Lawngtlai Electric Veng a sak mek pawh a kal pui zel dan turte rel a nih bakah kumin MLA inthlan lo awm tur leh Christmas lo thleng mai tura mipuite hnena thuchah (Resolution) pathum an passed bawk.

Assembly hman zawh hian kum 2013 leh 2015 inkar chhunga Sub-Headquarters hruaitu thar tur thlanna Pu K. Saitluanga, MIS, District Information and Public Relations Officer, Lawngtlai District (Returning Officer) kaihhruaina a neih nghal a ni a, hruaitu thar thlanchuahte chu President Dr. R.T Hnialum, Vice President Rev. K. Thathuaia, leh Treasurer Pi R. Zaithangi te an ni. MUP DANPUI in a phut angin heng President, Vice President leh Treasurer, Ballot Paper hmanga thlan chhuahte hian an thawhpui tur Secretary hrang hrang, Editor leh Adviser tur te ni sawm chhungin an ruat ve leh dawn a ni.

Assembly Report a a lan danin tunah hian Lawngtlai Sub-Headquarters MUP hnuaiah hian Unit 30 leh Area pakhat a awm mek a, member hi 1250 an awm mek bawk a ni.