Vawiin khan Lawngtlai khawpui thianghlimna tur leh a cheimawina kawnga hma lak zel dan tur ngaihtuahin Lawngtlai Town Beautification Committee chu an Chairman, Lawngtlai Bawrhsap Dr Arun T., IAS hovin DC Conference Hall-ah an thu khawm.

He hunah hian Member Secretary Pi Rochuangkimi Khenglawt, SDO (Sadar) chuan Swachh Bharat Mission (Urban) hnuaia hma lakna hrang hrangte sawi fiahin, hma lakna tur hma bak leh committee-in tih tur a neihte a tar lang a. Lawngtlai khawpui chu January thla tir khan open defecation free-a puan a nih tawh thu te, khawpui chhung lungrem remchang laiahte pawh hnam ziarang pho lang thei leh mipui tana zirtirna tangkai milem leh thu ziah chhoh mek a nih thu te pawh ngaihthlak a ni.

He thut khawmah hian Lawngtlai khawpui chhung khawlai kawngpui dunga hrui (cable) inzam hnawk lutuk then fai leh felfai zawka zam dan tur te, hoarding hlui tawphnawk zual then fai dan tur te sawi ho a ni a. District administration leh LADC lam te tang tlang a, VC leh YLA te nena thawk hova hma lak chhoh zel ni se, tih a ni.