No.3606/2020-2020

Lawngtlai, Vawkhniahzawn thla ni 30, 2020: Lawngtlai District-a COVID-19 positive case, Zoram Medical College (ZMC)-a RT-PCR hmanga an swab sample endik nawn a nih hnua negative ta mi 11 (mipa vek) te chu vawiin khan Lawngtlai Covid Care Centre (CCC) atangin dam taka chhuahtir an ni.

COVID-19 positive dam chhuak CCC atanga chhuak turte hi CCC-a anmahni enkawltu Dr Elsadai B. Lalbersiama'n dama chhuah an nihna lehkha (discharge certificate) hlanin, District Medical Superintendent Dr Zothanpari Chhakchhuak chuan dam chhuakte leh an chhungte tana hriat tur pawimawh a hrilhfiah a, chhuah feltir an ni.

Lawngtlai CCC-a enkawl positive dam chhuakte hi an chhuah hnu hian ni sarih (7) chhung mahni in lama inkhung hran chhunzawm rih tur leh, hemi chhung hian pawn chhuak lo va, inleng pawh kawm lo va, mahni chhungte nen pawh fimkhur taka khawsa ho turin thu rawn an ni a. Fimkhur tura tih an nih rual hian mi dang tan hlauh tur leh thinhrik chhan tur a awm lo tih medical lam chuan an sawi.

Heti hian Lawngtlai District-a positive case hmuh chhuah tawh zawng zawng 22 atangin dama chhuak 19 an awm ta a. Tun dinhmunah positive case CCC-a enkawl lai hmeichhe 3 an la awm mek a ni.

Attachment

  • Loading attachment...