729/2025-2026

Lawngtlai, 5th June 2025: Nimin chawhma dar 11:00 AM khan June ni 11- a  Lawngtlaia 'Green Mizoram Day 2025'  hman dan tur relin Lawngtlai District Level Committee on Green Mizoram  2025 an thukhawm a. Thutkhawm hi Pu Cheemala Sival Gopal Reddy, IAS, Lawngtlai bawrhsap leh Chairman, District Level Committee on Green Mizoram nibawk chuan a kaihruai.

Pu Cheemala Siva Gopal Reddy chuan member- te hena lawmthu sawina a nei hmasa a. State Level Sub- Committee on Green Mizoram- in  ruahmanna an siam chu a theih ang anga bawhzui a tul thu a tarlang a. Thingphun pawimawhna sawiin, department pakhat kutah chauh dah theih a ni lo a, department zawng zawng bakah  khawtlang hruaitu  leh mipuiten theihtawp chhuah tlan a tul  hle a ti. A bik takin, mihring leh ran ei chi emaw an  tana tangkai thei (Fodder & Fruits bearing trees)  phun uar a tul thu a sawi. Bawrhsap chuan  ram changkang apiangah Thing an phun nasa tih tarlangin, Lawngtlai khawpui mawi  leh chhenfâkawma siam turin uar zawka   thing phun a tul tak zet a ti a. Kawng hrang hranga hmasawnna hnathawh a nih avangin Mizoramah ramngaw  a chereu nasa em em a, chutiang karah chuan nasa zawka thingphun uar  tura in zirtir a hun tawh tak zet a ni, a ti. Thing leh mau suasam nasat a nih avangin sik leh sa a  danglam zel a, tui hna pawh  a tlem zel tih tarlangin  Pu Cheemala Siva Gopal Reddy chuan uar zawka thingphun  turin sawrkar department- te leh Lawngtlai mipuite a sawm nghal bawk.

Thutkhawmah hian Green Mizoram Day 2025 hman dan tur kawng hrang hrang  sawiho a ni a. Green Mizoram Day hi June ni 11, zing dar 10:30 AM  ah DC Office tualzawlah hman a ni dawn a.  Pu Cheemala Siva Gopal Reddy, Deputy Commissioner, chu Khuallian tura ruat niin, Pu K. Lalthanzara, Executive Secretary, LADC chu Chairman tura ruat a ni. Green Mizoram Day puala thu intiamkamna (Pledge) sawirualna neih a ni ang a, Pu K. Lalromawia, DCCF,LADC leh Member Secretary, Lawngtlai District Level Committee on Green Mizoram  chuan a kaihruai dawn a ni. Green Mizoram Day pual hian Department hrang hrang ten  thingtiak phun ni se tih niin, NH 02 - Saikah leh Chawntlangpui inkar kawngpui dungah thingtiak - 390  phun  ni se an ti a ni.

State Level Sub - Committee on Green Mizoram-  in a lo rel tawh angin, thingtiak phun tur  tam zawk hi 'Mesua ferrea ( Herhse)' Mizoram State Tree,  a ni ang a. Thingtiak phun tur hi Environment, Forest & Climate Change Department, LADC ten an tum dawn a ni. Thingtiak phun enkawl chhunzawm dan tur sawiho niin,  a phuntu  department ten hmalak ni se an ti a.  Kum khat chhungin vawi-  2, February leh November ah hnim samfai leh hna tul dangte thawh thin ni se tih  a ni. Kum danga lo tih thin tawh angin, Green Mizoram Day hian kangmei chhuak tur ven kawnga thawk tha khuate hnenah  'Village Level Fire Prevention Award 2025' hlanna neih nghal a ni bawk ang.

Nimina Lawngtlai District Level Committee on Green Mizoram  thutkhawmah hian Member- te an tel kim tha hle a, Pu K. Lalromawia, DCCF, LADC leh Member Secretary, Lawngtlai District Level Committee on Green Mizoram chuan lawmthu sawina neiin hun a khar.

Green Mizoram Day hi kum tin June ni- 11 ah thupui thlan bik nei a  hman thin a ni a. Kumin thupui atan hian " Ruahtui khawl nan Thing i phun ang u" ( Plant Trees and Catch the Rain) thlan a ni.