Vawiin khan LIKBK Assembly House, Chandmary, Lawngtlaiah World Vision India (WVI), Chhimtuipui Area Development Programme leh Mizoram State AIDS Control Society (MSACS) te tang kawp huaihawtin khawtlang hruaitute tan HIV/AIDS chungchanga hriat tur pawimawh hrang hrang zir hona (Advocacy on HIV/AIDS) hun buatsaih a ni.

He hun hi WVI-a CDF Pi Lalchhanhimi'n a kaihruai a. District AIDS Nodal Officer (DANO) Dr S. Thaizi chuan hun hman chhan sawiin, Mizoram hi HIV/AIDS vei tam lamah kan sang filawr hle a, HIV/AIDS laka kan thalaite an fihlim theihna turin sawrkar, kohhran leh khawtlang hruaitute hi kan tan ho va, thawh hona tha tak kan neih a ngai a ni, a ti a. HIV/AIDS veite chu thinhrik leh endawng mai lovin, khawtlangah rilru hahdam taka an awm theih nana tihtlangnel thiam a tul hle a ni, a ti.

Aizawl atanga hun hmanpuitu HIV Activist Pi Lalchhuanzuali chuan HIV/AIDS natna chu nawhchizuar leh inchiu thinte chauhvin an vei tura ngaih a, a veite entleu emaw, buaipui tul lova ngaih emaw a hun tawh lo tih a sawi a. Mizoramah HIV/AIDS vei an pung nasa em em a, a kai tam berte hi mipat hmeichhiatna atanga kai an nih avangin nu leh pa te pawhin kan fate sex chungchanga an hriat tur tul leh pawimawh kan zirtir a, an nun kan venpui a tul hle a ni, a ti.

Vawiina hun hmanah hian Lawngtlai khawpui chhunga VC, YLA, LWA leh MHIP hruaitute an tel a. Zawhna leh chhanna leh sawi hona hun hlawk tak hman a ni a. HIV/AIDS Committee din nghal niin, kal khawmte thisen endiksak nghal an ni bawk.

Lawngtlai District-ah hian kum 2016 September atanga kumin (2019) September thla thleng khan HIV positive 128 hmuh chhuah an ni tawh.

Attachment

  • Loading attachment...