No.6273/2020-2021 

Lawngtlai, Khuangchawi thla ni 20, 2020: Vawiin khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai District chhunga Airtel-in internet service an pek chhuah chungchanga harsatna an tawh leh a chin fel dan tur te sawi ho a ni.

Bawrhsap chuan khawvel changkanna ruala ke pen ve thei turin internet service tha neih a pawimawh thu sawiin, service provider-te'n harsatna an tawh pawhin mipuite hmakhua a nih avangin District Administration chuan tanpui a inhuam reng a ni, a ti.

He thut khawmah hian Airtel lam ai awh atangin report ngaihthlak a ni a. Lawngtlai District chhunga tower 84 din turah 78 chu a taka hman tan a nih tawh thu leh, a bak paruk chu hna thawktu leh khawl lam harsatna avang tea la puitlin theih loh a nih thu ngaihthlak a ni a. Lawngtlai khawpui chhung bikah tower hmun 5 awmin, darkar 24 chhungin 6000 GB data pek chhuah a ni a, mipuiin an inchan loh em avangin tower upgrade (thuam chak) a tul tawh hle tih ngaihthlak a ni bawk a. Lawngtlai Circuit House bula tower thar din tur chu rang taka hna tan a nih theih nan hma lak a tul thu tar lan niin, he'ng harsatna hrang hrang ching fel tur hian a rang thei ang bera thuneitu sang zawk lama thlen ni se, tih a ni.

Airtel hi service provider niin, tower leh power hi a buaipuitu dang awmin, service pe chhuak tur hian an thawh ho a ngai a. Tower-a electric supply tha a awm theih nana hma lak tulna te pawh vawiin hian sawi lan niin, P&E Department lam nen pawh sawi ho ni se, tih a ni bawk.