605/2022-2023
Ṭomir thla ni 24, 2022: Vawiin khan Lawngtlai District Level Coordination Committee on ASF & TADs chu Lawngtlai DC Conference Hall-ah an Chairman, Lawngtlai Bawrhsap Pu Amol Srivastava hovin an ṭhu khawm a. Tunlaia Mizoram chhunga ran hri leng mek, African Swine Flu (ASF) leh ram dang aṭanga ran lak luh vanga hri leng awm thei (Trans-boundary Animal Diseases) dang laka Lawngtlai District a him zel theih nana hma lak dan tur hrang hrang an sawi ho.


Pu Amol Srivastava chuan ASF chu hri chimawm leh hnawksak tak, ngaihthah chi loh a nih thu sawiin, he hri laka District him nan awmze nei taka hma lak dan tur ruahman a ṭul a ni, a ti.

Additional Deputy Commissioner Pu James Miahlung chuan ASF hri leng mek chungchanga Mizoram dinhmun leh Lawngtlai District dinhmun report pein, he hri leng laka District him nan ram dang leh district dang aṭanga ran lak luh khapna thu chhuah ṭhin leh kenkawh mek a nih thu a sawi a. Veterinary Officer Dr Charlie C. Chawngthu chuan AH&Vety Department hma lak dan a sawi fiah bawk.

Tun dinhmunah Lawngtlai District chhungah ASF hri hi a awm hriat a ni lo va. He hri leh ran hri dang laka District a him zel theih nan hmun dang aṭanga ran lak luh khapna chu khauh taka lekkawh chhunzawm ṭha tih a ni a. Ran talh turte'n ran hrisel chauh an talh theih nan Veterinary doctor-te'n an endik hnu chauh talh phal tih chu uluk taka kalpui chhunzawm tur niin, a khat tawkin dan lova ran talh an awm leh awm loh enfiah ṭhin tum a ni a. ASF leh TAD dang laka him nana hriat tur pawimawhte a zau thei ang bera mipui hriata puanzar leh tlangau autir ṭhin rel niin, khawtlang hruaitu leh tlawmngai pawlte nen pheikhai rual taka thawh ho dan ngaihtuah chhunzawm ni se, tih a ni.

Nikum khan Lawngtlai khawpui chhungah ASF vanga vawk thi 3 hmuh chhuah niin, department lamin hri a darh loh nan fimkhur taka hma la zuiin, hri darh tur hi ven a ni a. Tun dinhmunah chuan Lawngtlai District chu ASF lakah a him riha hriat a ni.

Vawiin ṭhut khawmnaa report-a tar lan danin, tun dinhmunah Mizoram chhunga district parukah ASF case hi hmuh niin, khaw 26-ah case hmuh chhuah a ni a. ASF vanga vawk thi hi 3,137 awm tawhin, vawk 2,675 chu suat a ni tawh bawk.

Attachment

  • Loading attachment...