Agricultural Technology Management Agency (ATMA), Lawngtlai District; State Agricultural Management & Extension Training Institute (SAMETI), Mizoram leh MANAGE Hyderabad te tang ho huaihawta Lawngtlai BNRGSK Hall-a ni 5 chhung awh tur thalai kut hna thawktute tana training buatsaih chu vawiin khan Lawngtlai Bawrhsap, ATMA Governing Board Chairman ni bawk Dr Andrew H. Vanlaldika chuan a hawng.

Khuallian Dr Andrew H. Vanlaldika chuan Mizoram kut hna thawktute chu an thatchhe lo va, tunlai thiamna hman tangkai kawngah kan la hnufual deuh avangin a hlawk tur angin an la hlawk lo mai chauh zawk a ni tiin, tunlai thiamna leh hna thawh dan hlawk zawk hmang thei turin intuai hriam fo a tul, a ti a. Tun hmaa lo tih than dan sahuai thing vawn tlat lo va, mi thiamte rawn peih leh an thu zawm thiam a pawimawh tih sawiin, training-a telte chu training-ah tihtak zeta an rilru pe tur leh Lawngtlai District tana chhawrnahawm tak ni tura an thil zirte a taka hman tangkai tum turin a chah a ni.

Ni 5 chhung awh tur training hawnna inkhawm hi Lawngtlai District ATMA Project Director Dr Benjamin Lalduhawma chuan a kaihruai a. Block Technology Manager Pu Lalnunzuala hnen atangin ATMA hma lakna report tawi ngaihthlak a ni a. Lawngtlai District chhunga lo neih leh ran vulh lama ti thate, Self Help Group thawk tha leh Farmer Friend thawk thate hnenah chawimawina thuziak leh tangka fai hlan a ni bawk.

He hun hi Agriculture, Horticulture, AH & Vety, Sericulture, Fisheries Department leh KVK-a officer te'n an telpui a. ATMA hnuaia Farmer Friend eng emaw zat an tel bawk.

He training hi Skill Training of Rural Youth (STRY) hnuaia buatsaih niin, India ram hmun hrang hrang leh Lawngtlai District-ah pawh buatsaih a lo ni tawh thin a. Tun tumah hian Nehru Yuva Kendra (NYK), Lawngtlai District hnuaia thalai kut hna thawkute hnenah "Ar vulh dan leh electric hmanga artui awp keu dan" tih thupuia hmangin zirtirna pek a ni ang.