2841/2022-2023

Sahmulphah thla ni 28, 2022: Kuki-Chin National Army leh Bangladesh Army te inkah avanga Bangladesh aṭanga Mizoram chhunga sahimna zawnga lo tlan lutte lo tuamhlawm dan leh enkawl zui dan tur ngaihtuahin vawiin khan Lawngtlai Bawrhsap Pu Amol Srivastava hovin Lawngtlai DC Conference Hall-ah ṭhut khawm buatsaih a ni.

Bawrhsap Pu Amol Srivastava chuan Bangladesh aṭanga raltlan lo lutte chu an chanchin hriat a nih veleh District Administration aṭanga a ṭul ang ang buaipuiin, anmahni chhawmdawlna tur ngaihtuah nghal a nih thu sawiin, sawrkar lam aṭangin theih tawpa ngaihven zui zel an nih thu a sawi a. Sahimna zawnga ram chhunga lo lutte chu a hnam ang zawnga lo thliar lo va, mahni mihringpui harsatna tawkte ṭanpui duhna rilru aṭanga lo dawnsawn a pawimawh thu a sawi a. District Administration leh raltlan chhawmdawlna kawnga hma latu pawl hrang hrangte inkarah inhriat pawhna ṭha a awm a, felfai zawka hma lakna kalpui a nih theih nan ṭhut khawm chu buatsaih a nih thu sawiin, pawl, kohhran leh mimal anga raltlante chhawmdawlna kawnga hma latu zawng zawng chungah lawm thu a sawi a ni.

Raltlan chungchanga Nodal Officer, Lawngtlai Sub-Divisional Officer (Sadar) Pi TT Beikhaizi chuan Lawngtlai District chhunga Bangladesh aṭanga raltlan lo lutte dinhmun tlangpui leh District Administration aṭanga chhawmdawlna an pek tawh dan te tar langin, State sawrkar lama mamawh hrang hrang an thlen belh thu a sawi a. Central Young Lai Association (CYLA), Bawm Students' Association (BSA), Pang Zirlai Pawl (PZP) leh Central Young Chakma Association (CYCA) hruaitute hnen aṭangin Bangladesh aṭanga raltlan lo lut an lo buaipui tawh dan leh chhawmdawlna kawnga hma an lak dan report ngaihthlak a ni bawk a. Lawngtlai District chhunga Bangladesh aṭanga raltlan awm mekte leh lo la thlen belh turte chhawmdawl leh enkawl zui dan turte sawi ho zui a ni.

Thuneitute'n an chhinchhiah danin, tun dinhmunah Lawngtlai District chhungah tun hnaia Bangladesh aṭanga raltlan lo lut mi 293 (mipa 132 leh hmeichhia 161) an awm mek a. An zinga mi 145 chu kum 18 chung lam niin, kum 18 hnuai lam mi 148 an awm bawk.

Raltlante hi Parva-III-ah community hall, primary school, health sub-centre, anganwadi centre leh high school building-ah te riahna leh khawsakna tur ruahmansak lailawk an ni a. District Administration aṭangin ngun taka vil reng niin, ei leh in, mutbu leh ni tin mamawh zualpui eng emaw zat pek a ni a. Police lamin security thilah vil reng bawkin, Health department aṭangin damdawi mamawh pek an nih bakah health clinic te buatsaihsak an ni a. CYLA leh tlawmngai pawl dang aṭangin a hmuna kal chilha chhawmdawlna pek niin, kohhran leh mimal aṭang pawhin chhawmdawlna kawnga hma lak a nih thu he ṭhut khawmah hian tar lan a ni.

Bangladesh-a buaina hi la kal mek a nih avangin raltlan lo luh belh an awm thulha lo inhmakhua lawk nan raltlante lo dah lailawkna hmun atana rawtnate vawiin ṭhut khawmah hian thlir ho a ni bawk.