537/2022-2023 

Ṭomir thla ni 18, 2022: Nimin khan Lawngtlai Bawrhsap Dr Andrew H. Vanlaldika chuan April 5 - 9, 2022 chhunga Hnahthiala khelh, 18th Mizoram Volleyball Association (MVA) Inter-District Volleyball Championship-a mipa team champion, District Volleyball Association, Lawngtlai (DVAL) mipa team pualin a office chamber-ah lawmpuina hun a buatsaih a. He hun hi Lawngtlai District Sports Committee (LDSC) hruaitute leh discipline hrang hranga hruaitute leh Central YLA ai awh te'n an hmanpui a ni.

Lawngtlai Bawrhsap Dr Andrew H. Vanlaldika chuan infiamna ngaina mi a nih thu leh sawrkar hnaa a luh hnu pawhin a theih chin chinah infiamnain hma a sawn theih nana theih ang tawka ke pen ṭhin a nih thu sawiin, infiamna chuan mihringte taksa mai ni lo, rilru leh ngaihtuahna thlenga a sawi danglam theih thu a sawi a. Volleyball-a Mizoram champion team-a hruaitute, infiam mite leh anmahni enkawltute chu fakawm a tih thu sawiin, an thawh rimna leh inpekna azarah Lawngtlai District chu Mizoramah a hming ṭha hle tih a sawi a, theih tawp chhuah chhunzawm zel turin a chah bawk.

Lawngtlai Bawrhsap chuan sawrkar scheme hrang hrang hnuaiah Lawngtlai District chhung hmun hrang hranga volleyball court siamna tur ruahmanna a awm thu sawiin, hmun ṭhenkhat phei chu hna ṭan theih mai tur a nih tawh thu a sawi a. He'ng hnate hi thawh ṭan a nih aṭangin theih tawp chhuaha hna thawktute lo enpui ṭhin turin LDSC leh volleyball lam hruaitute chu a chah a. Volleyball champion team te hnenah hian lawmpuina thuziak leh pawisa fai a hlan nghal a ni. 

Mizoram volleyball champion te puala lawmpuina hun hmannaah hian LDSC Vice Chairman Pu C. Lalhmangaihkima chuan hunserh hmangin, DVAL General Secretary Pu M. Lalramsiama'n inhmelhriattirna hun a hmang a. DVAL President Pu K. Lalromawia, LDSC Chairman Pu N. Lalramriliana leh Pu Alex Lalzawmpuia, Central YLA ai awhte hnen aṭangin thu sawi ngaihthlak a ni a.  DVAL mipa team Manager Pu R. Lalramfela'n technical report pein, LDSC Secretary Pu Matthews R. Laldinpuia chuan lawm thu sawiin hun a khar a ni.

Attachment

  • Loading attachment...