No.3639/2021-2022

Pawlkut thla ni 12, 2022: District Administration, Lawngtlai atanga ngenna chhang a, Every Infant Matters, New Delhi te'n Lawngtlai District chhunga chhungkaw khawsak harsate tanpui nana kawmawl (blanket) 250 an rawn pek chu vawiin khan Lawngtlai Bawrhsap Dr Andrew H. Vanlaldika chuan Lawngtlai District chhunga kohhran hrang hrang hruaitute hnenah an kohhran chhunga a dawng tur thlan chhuahte hnena an lo hlan chhawn atan a hlan.

Lawngtlai DC Conference Hall-a kawmawl inhlanna hun buatsaihah Bawrhsap Dr Andrew H. Vanlaldika chuan Every Infant Matters, New Delhi te'n tanpuina an rawn hlan chhan ber chu chhungkaw khawsak harsatna avanga chhungkuaa naupangte'n khaw vawt hrehawm an tuar lohna tur leh hriselna tha an neih theih nan a nih thu sawiin, Lawngtlai District-a chhungkaw khawsak harsate tanpui tura hma an laknaah lawm thu a sawi a ni.

Every Infant Matters te'n kawmawl an rawn thawn hian January ni 9, 2022 khan Lawngtlai a lo thleng a. Kawmawl 250 hi vawiin khan kohhran hrang hrang 10, Lairam Motherless Home leh a dang 5 hnenah a hlawma pek chhuah a ni.