Vawiin khan Govt Higher Secondary School, Lawngtlai-ah State Council of Educational Research and Training (SCERT) leh District Education Office, Lawngtlai te tang kawpin an buatsaih Career Conference 2016 chu hlawhtling taka hman a ni a. Lawngtlai District Chief Judicial Magistrate Pu Laldinpuia Tlau chu Khuallian a ni.

Khuallian chuan zirlaite chu lehkha thiam a that berzia hre tur leh tum bulfuk tak neia an nih theih sang ber nih tum theuh tura chahin, taima taka lehkha zir turin a fuih.

He hun hi DIET Principal Pi Janet Zonunmawii'n kaihruaiin, kal khawmte lawmna thu leh programme buatsaih a nih dan te a sawi a. SCERT Aizawl-a VGO Pi Caroline Zoramthangi leh Lecturer Pi Lianhlupuii Hnamte te pawhin thu sawiin, zirlaite chu tum fel tak nei a, chumi chu ni tura theihtawp chhuaha lehkha zir tur leh pass satliah mai lo va, chhawr tlak leh thiam tak tak nih tum turin an fuih bawk.

He Career Conference-ah hian zirlaite an zirna tanpui thei tur leh an hmathlir atana tangkai tur zirtirna “PowerPoint Presentation” hmanga entir a ni a. Conference hi Lawngtlai District Education Officer Pu Lalzuiliana pawhin hmanpuiin, Govt Region H/S, Govt Southern Public H/S, Govt Lairam High School leh Govt College Veng H/S atangin Class-X zirlai thahnem tak an tel a ni.