2688/2022-2023
Sahmulphah thla ni 16, 2022: Vawiin khan Lawngtlai District chhunga Jal Shakti Abhiyan (Catch the Rain) hma lakna enfiah tura lo kal, Central Nodal Officer (CNO)-te nen Lawngtlai DC Conference Hall-ah thut khawm buatsaih a ni a, District chhunga JSA hma lakna thlir ho a ni.

He thut khawm hi Lawngtlai Bawrhsap Pu Amol Srivastava chuan kaihruaiin, Central Nodal Officer-te lawmna thu a sawi a. CNO, Ministry of Minority Affairs-a Director Pi Moina Benazir chuan Lawngtlai District chhunga JSA hma lakna hlawhtlinnate a hmun ngeia en tur leh hma lakna kalpui zel nana thil pawimawhte zir chiang tura lo kal an nih thu a sawi a. CNO pakhat zawk, Central Water and Power Research Station-a Scientist 'C' Pu MSR Naidu pawhin JSA hma lakna enfiah leh zir chianna atana thil pawimawh hrang hrang a sawi bawk.

He hunah hian District Rural Development Office-a Project Director Pi Marilyn Rualzakhumthangi chuan Amrit Sarovar hnuaia tuihna humhalh leh ruahtui khawl kawnga an hma lakna leh JSA hnuaia an hma lakna tlangpui a lem nena entirin a sawi fiah a. Public Health Engineering Department (PHED) Lawngtlai WATSAN Division-a Sub-Divisional Officer Er L. Sangromuana'n JSA hnuaia an hma lakna hrang hrang a lem nen tar langin a sawi fiah bawk a. District chhunga JSA hma lakna dinhmun sawi ho zui a ni bawk.

Hemi hnu hian CNO-te hi RD Department leh PHED official-te chuan Lawngtlai District chhunga JSA hma lakna hrang hrangte a hmunah an tlawhpui a. Hma lakna a hmuna tlawh (site visit) hi naktuk lam pawh khian chhunzawm tura ruahman niin, Lawngtlai District chhunga JSA hma lakna an en zawhah CNO-te hian Siaha District an tlawh chhunzawm dawn a ni.

Attachment

  • Loading attachment...