No.881/2021-2022

Lawngtlai, Nikir thla ni 9, 2021: Chhiat rupna (disaster) a lo thlen thulha felfai leh rang zawka enfiah hna leh chhawmdawl hna kalpui a nih theih nana Lawngtlai khawpui chhung veng hrang hrang bialtu tura ruat Zonal Officer-te chu vawiin khan Lawngtlai Additional DC Pi Marilyn Rualzakhumthangi hovin a office chamber-ah an thu khawm.

Chairman, Pi Marilyn Rualzakhumthangi chuan furpui a lo thlen mai dawn avangin chhiatna thleng thei laka inven leh chhiatna a lo thlen thulha rang taka che chhuak thei tura inralrin reng a tul tih sawiin, zonal officer-a ruatte chu an mawhphurhna leh pawimawhna hre chiang a, tlawmngai leh thahnem ngai taka thawk turin a chah a. An bial chhungah chhiatna a lo thlen thulha rang taka che chhuak thin tur te, chhiatna thlen hmaa lo inven lawk theihna tur bengvar a, invenna atana tul ang chi-ah pawh DC office-ah felfai taka rawtna leh report te thlen thin tur te'n a chah bawk.

He hunah hian zonal officer-te mawhphurhna leh tih turte sawi ho a ni a. Zonal officer-te'n kum hmasa lama an lo tawn tawh atanga chhiat rupna thlen thulha hma lak dan tur leh tih dan tha nia an hriatte sawi ho niin, rawtna hrang hrang an thlente chu ngaihtuah ho a ni bawk.

Chhiat rupna thlen thulha chhanchhuah leh chhawmdawlna lama che chhuak vat tur, District Disaster Management Authority (DDMA) hnuaia din member 9 awmna Quick Response Team (QRT) te pawh tangkai zawka hman dan tur sawi ho a ni bawk a. Lei min hlauhthawnawm avanga silpauline-a khuh ngai, mi nazawng tana chet harsatna hmun angah te pawh QRT te chu rawih thin ni se, tih a ni.

District Disaster Management Authority ruahmannain Lawngtlai khawpui chunga veng 12 chu zone (bial) 4-ah then niin, zone khat huam chhunga chhiat rupna thlengte a rang thei ang bera enfiah a, chet lak dan tur leh chhawmdawlna ngaihtuaha hma la turin zonal officer pathum zel ruat an ni a. Zone 4 awma mawhphurtu bik zonal officer 12 bakah hian, zonal officer-te awm remchan loh changa an ai awh theitu tur reserved zonal officer 3 ruat tel an ni bawk.

Lei min, tui lian, thlipui tleh, rial tla leh khuarel chhiatna hrang hrang bakah, kangmei avanga in leh lo, bungrua, huan thlai chhia leh nunna hial chante an awmin, bialtu zonal officer-te hnenah hian rang taka thlen tur a ni ang a. Anni'n a hmunah kalin an enfiah nghal ang a, chhiatna thleng azira chet lak dan tur leh chhawmdawl hna kalpui dan turte ruahmanin, report pekna tur form awm sa hmangin District Administration-ah an thlen chhawng ve leh ang a. Zonal officer-te enfiahna leh rawtna behchhanin hma lak zui a ni thin dawn a ni.

Chhiat rupna thlen thulha hma latu tur zonal officer ruat hi chhiatna thlengte felfai leh rang zawka enfiah leh chin fel zung zung a nih theih nana ruahman a ni a. Heti ang harsatna a thlen changa thawktu lam indaih lo lutuk thin chhawk zangkhaina a nih beisei a ni bawk.

Zone then hran dan leh bialtu zonal officer-te chungchanga siam rem ngai te pawh vawiin hian sawi ho nghal a ni a. Zone then dan leh zonal officer-te hming leh anmahni biak pawh theihna te chu siam that fel a nih hnuah mipui hriat theih tura puanzar a ni ang a. Khawtlang hruaitute leh mipuite pawh chuti ang chhiatna thlengte chu anmahni bialtu zonal officer hrilh hmasa thin turin ngen an ni.