2198/2024-2025

Dated Lawngtlai, 25th September 2024 : Vawiin chawhma dar 10:30 khan Urban Development & Poverty Alleviation (UD&PA)  bultumin 'Cleanliness Week  2024' hawnna inkhawm chu  Deputy Commissioner Office Complex, Electric Veng, Lawngtlaiah  neih a ni a. Pu Cheemala Siva Gopal Reddy, IAS, District bawrhsap leh Chairman, District Level Steering Committee on SHS nibawk chuan khuallian niin a hmanpui.

Pu Cheemala Siva Gopal Reddy, IAS chuan 'Cleanliness Week' hawnna inkhawm a sawrkar department hrang hrang hotute, NGO leh Zirlai lo kal khawmte hnena lawmthu sawina a nei hmasa a. India ramin faina leh thianghlimna kawnga rahbi thar kai turin kum 2014 khan 'Swachh Bharat Mission (SBM)'  a lo tan  tawh tih tarlangin, chumi chhunzawm zel nan chuan Swachhata Hi Seva (SHS) hi kalpui a  ni, a  ti. Faina leh thianghlimna kawngah hmasawnna tur tam tak a awm a, sawrkar department pakhat kutah engkim dah theih a ni lo tih sawiin, sawrkar, NGO, Kohhran leh khawtlang mipuite tanho a ngai tak zet a ti.

Faina beihpui thlak tura 'Cleanliness Week' hawn a ni chu lawmawm a tih thu tarlangin, bawrhsap chuan  he hun hman hun chhung chauha duhtawk mai lo a, fai leh thianghlimna chu a taka nunpui a tul hle a ti a. Khawvel ram changkang leh ram nuam ber berte hian  Faina lamah theihtawp an chhuah thin  tih sawiin Pu Cheemala Siva Gopal Reddy chuan ram nuam leh chhenfakawm siam tur leh Lawngtlai khawpui ngei pawh a lo fai a, a lo thianghlim zawk theihna tura theihtawp chhuah thin turin Lawngtlai mipui zawng zawngte a sawm nghal bawk.

Pu Netralal Jaisi, EE, PHED chuan report tawi pekna neiin, Safai Apnao Bimaari Bhagao (SABB) chu July ni 14 atanga ni 31, August chhung kalpui a ni, a ti a. Hemi hun chhung hian Lawngtlai khawpui chhunga Zirna In hrang hrang leh Anganwadi Centre-ah te Awareness Campaign neih niin, Lawngtlai khawpui chhung a veng hrang hrang ten Vengchhung thenfai hnatlang an nei bawk a ti. Swachhata Hi Seva 2024 (Urban) chu September ni 14 atang khan kalpui tan niin, Lawngtlai khawpui chhunga sawrkar Offfice leh zirna Inah te Faina thutiam sawihona neih a nih thu tarlangin, Kohhran hrang hrangten Biak In in leh a vel tihfai hnatalng thawkin; NGO -ten Faina hnatlang an nei bawk a ti.   Swachhata Hi Seva 2024 (Gramin) hnuaiah Swachhata Mein Bhagidari (Faina hnatlang/ pledge/ Gram Sabha leh Quiz) chu khaw -18 ah neih tawh a ni, a ti a.  Celanliness Target Unit (Bawlhhlawh a hmun ni lova paihna hmun zawnchhuah) bikah khaw - 42 ah zawnchhuah tawh niin, khaw -24 ah a tihfai hnathawh tawh a ni, a ti. September ni 24 khan Sanitation Workers, LADC leh PHED tuisem te  hriselna endik sak niin, Swachhata Hi Seva puala faina lam inzirtirna (Awareness) leh kawngzawh (Rally) chu thingtlang khuaah neih chhunzawm mek zel a nih thu a sawi a. Swachhata Hi Seva 2024  chu October ni 2 thleng kalpui tura ruahman a nih  thu a tarlang bawk.

Vawiin 'Cleanliness Week 2024' hawnna inkhawmah hian Faina lama thu intiamkamna 'Swachhata Pledge' sawirualna neih niin, Pi Margaret J. Vanlalremmawii, DPO, UD&PA chuan lawmthu sawina neiin hun a khar.