No.3287/2019-2020

Tunlaia Novel Coronavirus (COVID-19) hri leng mek chungchang leh India Prime Minister-in March ni 25 - April ni 14, 2020 thleng (ni 21 chhung) ram puma inkharkhip (complete lockdown) a puan bawhzui dan tur leh mipuite'n harsatna an tawh loh nana hma lak dan tur ngaihtuahin vawiin khan Lawngtlai District Task Force leh Disaster Management Committee chu an Chairman, Lawngtlai Bawrhsap Pi Shashanka Ala, IAS hovin a pisaah an thu khawm.

He inkharkhip hi tha taka zawm a nih theih nan mawh phurtu hrang hrang insiam a ni a. Hemi chhung hian mipuiin ei leh bar leh an ni tin mamawh an tlakchham loh nan ruahmanna siam a ni a. Sawrkar thawhpuia Central Young Lai Association (CYLA) leh a hnuaia branch hrang hrangte'n chhun zan zawma duty hna an thawh chungchangah member kal khawmte chuan lawm thu sawiin, he an hna thawh hi chhunzawm zel tura beisei an ni a. Veng tinah khawsak harsa zual zawn chhuah a, chhuanchhama an awm loh nana tanpuina pek rel niin, ni tin mamawh zuar dawr awm zawng zawng leh an thil chhek khawl dan te chhinchhiah a, mipuiin an mamawh an tlakchham loh nana hma lak chhoh zel tum a ni.

Ei leh bar leh hriselna chungchang a pawimawh ber avangin mipuiin an mamawh ang inkhai rual taka an hmuh theih nan tualchhunga hma latu (local task force) - VC leh YLA te'n ruahmanna siam se, tih a ni a. Anganwadi hrang hranga ei tur chhek khawlte pawh a zat hriat fel a, mipuia sem dan tur ngaihtuah ni se, tih a ni a. Retailer tinah April thla chanpual (quota) pek a, mipuia sem lawk ni se, tih a ni bawk.

He inkharkhip chhung hian ei leh bar leh hriselna lam bakah, tui, kawlphetha, inbiak pawhna leh mipui mamawh zualpui dangte tlakchham a awm loh nan a kaihhnawih department te chu theih tawp chhuah tura ngen an ni a. Mipuite pawh anmahni leh ram himna tur a ni tih hriaa ina inkhung tur leh thuneitute'n fimkhurna tur hrang hrang an duante zawm a, sawrkar leh tualchhunga hma latute thu chhuak ngaichang thiam turin District Task Force on COVID-19 chuan a ngen a ni.