No.2039/2020-2020 

Lawngtlai, Nikir thla ni 15, 2020: Vawiin khan chhungkaw remtih tlannain Lawngtlai Chandmary Venga Pu Thathluna Chinzah fate pahnih, C. Lalvenhima leh Sarah Lalhlunpuii te chu an unauin COVID-19 hri leng dona kawnga District Hospital Lawngtlaia a tul apiang thawk turin an inpe.

COVID-19 hri leng vanga nunphung khaihlak leh Mizorama positive case pung zel karah he hri leng dona leh enkawlna kawngah medical lam indaih loh a na hle a. Lawngtlai District-ah pawh positive case pali awmin, Covid Care Centre-a khung hran eng emaw zat an awm bawk a, District Hospital Lawngtlaiah thawktu awm sa bakah nurse leh Group D hna lama pui thei an mamawh hle a ni.

Hei hi hriain Pu Thathluna Chinzah te chhungkua hian COVID-19 hri leng kara DHL-a thawktu indaih lohna eng emaw chen a phuhruk beiseiin an fate pahnih hi an pen chhuahtir a. Hlawh leh hlam eng mah phut lovin, DHL-in a mamawh angin naktuk atangin an thawk tan dawn a ni.

District Medical Superintendent Dr Zothanpari Chhakchhuak chuan DHL-in a mamawhna hriaa inpe an nei chu lawmawm a tih thu a sawi a. Mipuiin an hriat thiam loh avangin damdawi ina thawkte'n thinhrik an tawk nasain, an chhungte, in luahnate leh thenawm khawveng lakah thlengin harsatna an tawh phah a, hei hi a pawi hle a ni, a ti a. Damdawi inah fimkhur tak leh a him thei ang bera an chet thin avangin chhungte leh thenawm khawvengte tan hlauhthawn tur a awm lo va, a him lo theia an ngaih chinah chuan a thawktute pawh mahni ina hawtir lova quarantine ve zel turin ruahmanna pawh siam a nih thu a sawi.