778/2024-2025
2024 Nikir thla ni 12: Vawiin chawhma khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu Lawngtlai Additional Deputy Commissioner Pi B. Malsawmtluangi hovin Lawngtlai DC Conference Hall-ah an ṭhu khawm.
He ṭhut khawmah hian Lead Bank Office-a Lead District Manager (Lawngtlai & Siaha) Pu JM Soren leh Reserve Bank of India (RBI) Manager Pu Sumit Mandal te bakah, bank hrang hrang leh line department ai awhte an tel a ni.
He hunah hian meeting hmasa, March ni 13, 2024-a DCC meeting minute chu pawm a ni a. Kum 2024 January thla aṭanga March thla (4th Quarter, 2023-24) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.
He hunah hian financial inclusion plan hnuaiah Lawngtlai District chhunga mihring 2,000 aia tlem chenna khaw tinah mipuiin bank kal tlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dah tura hma lakna kalpui mek a nih thu leh tun dinhmunah Lawngtlai District chhungah bank branch 12, ATM booth 5, business correspondent 84 leh IPPB Banking Touch Point 1 a awm mek thu tar lan a ni a. January - March 2024 inkar chhungin bank hrang hrang leh Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum 88 buatsaih a nih thu tar lan niin, line department-te nena ṭang hovin bank-te'n FLC tam zawk buatsaih turin hma lak chhunzawm se, tih a ni.
He hunah hian pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Yojana (APY), etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Lawngtlai District-a bank-te chuan March 2024-ah CD Ratio 121.38% an nei tih tar lan niin, December 2023 (117.08%) nen khaikhinin CD Ratio hi 4.30%-in a pung a ni.
Kum 2023-2024 sawrkar kum chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahman chu a pum puiah khum niin, bank-te hian 109.10% loan an pe chhuak a. PMEGP, NRLM, NULM leh PMAY kal tlanga sawrkar sponsor scheme hnuaiah loan 158 (₹ nuai 431.60 hu) pek chhuah a ni a; Kisan Credit Card (KCC) hnuaiah kut hna thawk, ran vulh leh sangha khawitute tan loan 6,414 (₹ nuai 4,640.27 hu) pek chhuah tawh a ni bawk.
He hunah hian kum 2024-2025 chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahman chu thlir ho ni bawkin, bank-te'n mahni target tlin ngei turin ṭan lak ni se, tih a ni a. Bank leh mipui sum vawn himna (security) lam te leh pawisa leng vel (currency management & remittance) chungchang te pawh sawi ho a ni bawk.
