1956/2026-2027

Dated Lawngtlai,27th August 2026 : Vawiin chawhma dar 11:00 AM khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) for the Quarter Ending June , 2026 chu Bawrhsap Pu Donny Lalruatsanga kaihhruaiin DC Conference Hall-ah an thukhawm.

Pu Donny Lalruatsanga chuan Bank hrang hrang aiawh lokalte hnena lawmthu sawina a nei hmasa a. Sawrkarin Scheme emaw programme - a kalpuiahte chak zawka loan pek chhuah a pawimawh hle tiin, hemi kawnga ngaihtuahna thar nei turin a chah a.  Lawngtlai mipuiten Bank an dawr nasa tih hriaa, mipuite lo dawngsawng thiam fo thin turin a ngen nghal a ni. Bank- te chu FLC nei ngei ngei thin tura chahin, a tul dan ang a sawrkar line department hrang hrangte nena thawkho thiam turin a chah a. Bawrhsap chuan Social Security Schemes hrang hrang- PMJDY, PMJJBY, PMSBY leh a dangte hnuaia loan pek chhuah tur target an neihte tihhlawhtling ngei turin a chah nghal bawk.

He ṭhutkhawmah hian Lead Bank Office-a Lead District Manager (Lawngtlai & Siaha) Pu PC Lalchuailova  leh Bank hrang hrang bakah  line department - aiawhte an tel a ni.

He hunah hian meeting hmasa, May  ni 20, 2026-a DCC meeting minute chu pawm a ni a. Kum 2026 chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian Financial Unclusion Plan (FIP) hnuaiah Lawngtlai District chhunga mihring 2,000 chunglam chenna khaw tinah mipuiin bank kal tlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dah tura hma lakna kalpui mek a nih thu leh tun dinhmunah Lawngtlai District chhungah Bank Branch- 12, ATM Booth - 8, Business correspondent- 84,Financial Literacy Centre- 1, leh Indian Postal Payment Bank-1, a awm mek thu tar lan a ni a. April - June  2026 chhunga khan  bank hrang hrang, Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum- 50 buatsaih a nih thu tar lan niin, line department-te nena ṭang hovin bank-te'n FLC tam zawk buatsaih turin hma lak chhunzawm se, tih a ni.

Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Lawngtlai District-a bank-te chuan June  2026-ah CD Ratio 103.71% an nei tih tar lan a ni a, March 2026 (108. 89%) nen khaikhinin CD Ratio hi 5.18  %-in a thlahniam  a ni.

Kum 2026- 2027 sawrkar kum chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahman atangin June  2026 thleng khan bank-te hian Priority Sector hnuaiah 25.73 % leh Non - Proirity Sector hnuaiah 29.83 % loan an pe chhuak tawh a ni. June , 2026 thleng khan PMEGP hnuaiah loan nuai 33.39 hu pek niin; DAY- NRLM/ MzSLRM - ah nuai 83.50;   PMMY - ah nuai 194.91 leh KCC loan nuai 581.75 hu pek chhuah a ni.

He hunah hian kum 2026-2027 chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahmanna an neih chu chu thlir ho a ni a. Bank leh mipui sum vawn himna (security) lam te leh pawisa leng vel (currency management & remittance) chungchang bakah Bank zawng zawngten quarter tawp atanga ni 15 chhung ngei a FLC data submit ni se tih an rel  a. Bank Branch zawng zawnga awm ngei ngei tur - Security Guards,  CCTV, Fire Extinguisher leh Security Alarm- te chu ngaihpawimawh thar ni se an ti bawk.