1831/2025-2026

Dated Lawngtlai, 26th August 2025 : Vawiin chawhma dar 11:00 AM  khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) for the Quarter Ending June, 2025 chu Pu David Lalrinawma, Addl. Deputy Commissioner, kaihhruaiin  DC Conference Hall-ah an ṭhukhawm.

Pu David Lalrinawma chuan Bank hrang hrang aiawh lokalte hnena lawmthu sawina a nei hmasa a. Bank- te chu Lawngtlai mipuiten an dawr nasa tih riaa, mipuite lo dawngsawng thiam  fo thin turin a ngen a.  A bik takin mipuiten hamthatna an neih hrang hrang an hriat zung zung theihna tur leh  bank dawr kawngah harsatna an tawh lohna tura Financial Literally Campaign (FLC) ngaipawimawh thar turin a fuih a ni. Bank- te chu FLC nei ngei ngei thin tura chahin, a tul dan ang a sawrkar line department hrang hrangte nena thawkho thiam turin a chah a.  Social Security Schemes hrang hrang- PMJDY, PMJJBY, PMSBY leh a dangte hnuaia loan pek chhuah tur target an neihte tihhlawhtling ngei turin Pu David Lalrinawma chuan a chah nghal bawk.

He ṭhutkhawmah hian Lead Bank Office-a Lead District Manager (Lawngtlai & Siaha) Pu JM Soren leh Reserve Bank of India (RBI) aiawh bakah, bank hrang hrang leh line department ai awhte an tel a ni.

He hunah hian meeting hmasa, May ni 22, 2025-a DCC meeting minute chu pawm a ni a. Kum 2025   chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian Financial Unclusion Plan (FIP) hnuaiah Lawngtlai District chhunga mihring 2,000 chunglam  chenna khaw tinah mipuiin bank kal tlanga hamṭhatna hrang hrang an chhawr ve theih nan an khuaah bank branch emaw, business correspondent emaw, Indian Postal Payment Bank emaw dah tura hma lakna kalpui mek a nih thu leh tun dinhmunah Lawngtlai District chhungah Bank Branch- 12, ATM Booth -8, Business correspondent- 84,Financial Literacy Centre- 1, leh Indian Postal Payment Bank-1,  a awm mek thu tar lan a ni a.April - June, 2025 inkar chhungin bank hrang hrang, Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum- 50  buatsaih a nih thu tar lan niin, line department-te nena ṭang hovin bank-te'n FLC tam zawk buatsaih turin hma lak chhunzawm se, tih a ni.

Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Lawngtlai District-a bank-te chuan June 2025-ah CD Ratio 112.92% an nei tih tar lan  a ni a .March, 2025 (121.75%) nen khaikhinin CD Ratio hi 8.83%-in a a tlahniam  a ni.

Kum 2025-2026 sawrkar kum chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahman atangin June,2025 thleng khan bank-te hian Priority Sector hnuaiah 25.23% leh Non- Proirity Sector hnuaiah 45.12 %  loan an pe chhuak tawh a ni. Ni 30, June, 2025 thleng khan PMEGP hnuaiah loan nuai 6.32 hu pek niin, NRLM - ah nuai 107.06,  PMMY - ah nuai 276.23 leh KCC loan nuai 450.92  hu pek chhuah a ni a. Priority Sector ah hian Non- Performing Asset- 6.28% leh Non Priority Sector ah hian Non- Performing Asset- 1.51% a awm bawk a ni.

He hunah hian kum 2025-2026 chhunga Lawngtlai District chhunga bank-te'n loan an pek chhuah dan tur, Annual Credit Plan (ACP) ruahmanna an neih chu chu thlir ho a ni a. Bank leh mipui sum vawn himna (security) lam te leh pawisa leng vel (currency management & remittance) chungchang bakah Bank zawng zawngten quarter tawp atanga ni 15 chhung ngei a FLC data submit ni se tih an rel  a. Bank Branch zawng zawnga awm ngei ngei tur - Security Guards,  CCTV, Fire Extinguisher leh Security Alarm- te chu ngaihpawimawh thar ni se an ti bawk.