Vawiin khan Lawngtlai District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu C. Lalrosanga hovin Lawngtlai DC Conference Hall-ah an thu khawm.

Chairman Pu C. Lalrosanga chuan ram hmasawn nan sawrkarin ruahmanna (scheme) hrang hrang a duang a, DISHA chu he'ng scheme-te tihhlawhtlinna kawnga tha zawka hna thawh a nih theih nana mipui ai awha thlan chhuah te, a hna kalpuitu sawrkar hna thawk leh tlawmngai pawlte nena inrawn khawmna leh sawi hona hmun pawimawh tak a ni, a ti a. Sawrkar hna thawkte paw'n tangkai taka hman tum tura chahin, tan lak ngaihna lai leh ngaih pawimawh lai turte zir thar nan hman thiam a pawimawh, a ti a. Sawrkar laipui atanga sum lo kal hmanga hna thawh a that tawk loh chuan a lehpeka hna leh sum lo chhuak turin a tuar theih avangin theih tawp chhuah a tul a ni, a ti. 

He DISHA thut khawmah hian Lawngtlai East bialtu MLA Pu H. Biakzaua, Tuichawng bialtu MLA Dr BD Chakma, LADC leh CADC-a CEM-te, Member Secretary Lawngtlai Bawrhsap Dr Andrew H. Vanlaldika leh DRDA Project Director Pi Marilyn Rualzakhumthangi bakah, sawm bik sawrkar official-te, bank leh tlawmngai pawl ai awhte an tel a. Sawrkar kum kal mek 2020-21 chhunga Lawngtlai District-a sawrkai laipui ruahmanna hnuaia hmasawnna hna hrang hrang thawh dan te thlir ho a ni a. Sawrkar scheme hrang hrang kalpuina kawnga harsatna awmte leh a chin fel dan turte sawi ho a ni.

DISHA thut khawma tar lan dan chuan, DRDA kal tlanga hna thawh Mahatma Gandhi National Rural Employment Guarantee Act (MGNREGA) hnuaiah Lawngtlai District-ah job card 34,352 awm mekin, kum 2020-21 chhungin ni 78 inhlawhna siam tawh a ni a. Job card Aadhaar seeding tih tawh zat hi 96.34% a ni. Material component atanga hna thawh 3,259 atangin 2,704 chu thawh zawh tawh niin, thawh lai mek 555 a awm. Pradhan Mantri Awaas Yojana-Gramin (PMAY-G) hnuaiah kum 2019-2020 atana beneficiary 1,037 leh kum 2020-2021 atana beneficiary 2,718 chu kalpui mek a ni.

He’ng bakah hian P&ED hnuaia scheme hrang hrang, PWD hnuaia PMGSY, PHED hnuaia Jal Jeevan Mission leh Swachh Bharat Mission (Grameen), LADC hnuaia NLCPR, NULM hnuaia PMAY-HFA(U) leh SBM(U), CMO hnuaia National Health Mission hma lakna hrang hrang, BSNL, Samagra Shiksha, DCSO hnuaia National Food Security Act hma lakna, Social Welfare Department hnuaia NSAP leh ICDS hma lakna, Industries hnuaia PMEGP, BDO hrang hrang hnuaia BADP hma lakna leh DRDA hnuaia MzSRLM & DDUGKY leh PMKSY hma lakna te thlir ho niin, hma sawnna tur leh rawtna hrang hrang sawi ho a ni bawk.