Vawiin khan Lawngtlai District Development Co-ordination and Monitoring Committee (DISHA) chu an Chairman, Lok Sabha MP Pu CL Ruala leh Co-Chairman, Rajya Sabha MP Pu Ronald Sapa Tlau te hovin Lawngtlai DC Conference Hall-ah an thu khawm.
He DISHA thut khawmah hian Lawngtlai East Bialtu MLA Pu H. Zothangliana, DISHA Member Secretary Lawngtlai Bawrhsap Dr Arun T., IAS leh LADC CEM Pu T. Zakunga te bakah, sawrkar official-te, bank leh tlawmngai pawl ai awhte an tel a. May ni 26, 2017-a DISHA thu rel bawh zui dan ngaihthlak niin, kumin 1st leh 2ndQuarter (April-September) chhunga Lawngtlai District-a hmasawnna hna hrang hrang thawh dan te thlir ho a ni a. Hmasawnna hna thawh kawnga hlawhtlinna leh harsatna hrang hrang awmte sawi ho niin, a chin fel dan tur leh thawh zel dan tur ruahmanna leh rawtna te siam a ni.
DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah April-August, 2017 chhung hian Lawngtlai District-ah ni 38 inhlawhna siam a ni tawh a. Tunah hian Lawngtlai District pumpuiah Job Card 29114 a awm mek a. Job card-a hming chuang Aadhaar nei thei mi 57961 zinga 8600 chuan Aadhaar enrolment an ti tawh a ni. Convergence hmanga hna thawh hnuaiah ek in 291 leh anganwadi centre 6 sak a ni tawh bawk.
Pradhan Mantri Krishi Sinchayee Yojana (PMKSY) hnuaiah Lawngtlai District-ah Project 17 awmin, Project I & II hi March 2017 khan a tawp tawh a. Project dang 15 la kalpui mek zingah, project 13 chu sum awm loh vanga chawlh lailawk niin, project 2-ah chauh hna thawh theih a ni rih a. Pradhan Mantri Awaas Yojana-Gramin (PMAY-G) hnuaiah kum 2017-2018 chhung atana target beneficiary 1817 atangin 1st phase-ah beneficiary 696 thlan fel tawh an ni.
He’ng bakah hian MzSRLM hnuaia hma lakna te, National Health Mission hnuaia Programme hrang hrang te, Social Welfare Department hnuaia National Social Assistance Programme chungchang te, DEO, RMSA leh SSA hnuaia zirna kawnga hma lakna te, P&E Department hnuaia Deendayal Upadhyaya Gram Jyoti Yojana (DDUGJY) hnuaia khaw 7 eng pekna tura ruahmanna kalpui mek leh P&E kaihhnawih scheme dang chungchang te, PHED hnuaia National Rural Drinking Water Programme (NRDWP) leh Swachh Bharat Mission (Gramin) te thir ho a ni a. PWD hnuaia Pradhan Mantri Gram Sadak Yojana (PMGSY) kawng 6 laih mek zinga pali chu zawh a nih tawh thu te, ODF-a Lawngtlai District puang tura hma lakna kalpui mek a nih thu te tar lan a ni bawk.
