Vawiin khan Lawngtlai District Development Co-ordination and Monitoring Committee (DISHA) chu an Chairman, Lok Sabha MP Pu CL Ruala leh Co-Chairman, Rajya Sabha MP Pu Ronald Sapa Tlau te hovin Lawngtlai DC Conference Hall-ah an thu khawm.

Co-Chairman Pu Ronald Sapa Tlau chuan meeting kaihruai hmasain, nikum October thlaa DISHA ?hut khawm tur chu MLA Inthlanpui avanga neih theih a nih loh thu leh kumin April-a mi tur pawh MP inthlan tur avanga neih theih a nih dawn loh thu a sawi a. Chairman Pu CL Ruala chu Lok Sabha MP term tawp ruala a chawlh zui tawh dawn avangin a hova thut khawm hnuhnung ber tur a ni tiin, kum upa tak thlenga chak, inthazo leh zuanzang taka ram rawngbawl hna a thawk thei chu fakawm a tih thu leh a kaihhruaina hnuaiah DISHA kal tlanga hma sawnna hna thawh tluang taka a kal theih thu a sawi a. Member zawng zawng ai awhin thlahna leh duhsakna chibai a buk.

Chairman Pu CL Ruala chuan a kaihhruainaa DISHA tluang taka a kal thei leh a hun tawp ber an thleng thei chu lawmawm a tih thu sawiin, member te thawhpuina tha tak a dawn avangin lawm thu a sawi a. Sawrkar hna thawkte chu sawrkar kut ke ber an nih avangin ram hma sawnna atan rinawm leh thahnem ngai taka hna thawh chhunzawm zel turin a chah a. Kum kal taa India rama DISHA thut khawm nei tha ber state pathum zingah Mizoram a lan thu a tar lang bawk.

He DISHA thut khawmah hian member leh sawm bik sawrkar official-te, bank leh tlawmngai pawl ai awhte an tel a. Sawrkar kum kal mek 2018-19 chhunga Lawngtlai District-a hmasawnna hna hrang hrang thawh dan te thlir ho a ni a. Sawrkar scheme hrang hrang kalpuina kawnga harsatna awmte leh a chin fel dan turte sawi ho a ni.

DISHA thut khawma tar lan dan chuan, DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah Lawngtlai District-ah job card 30983 awm mekin, kum 2018-19 chhungin ni 83 inhlawhna siam tawh niin, ni 92 tlin theih beisei a ni a. Pradhan Mantri Awaas Yojana-Gramin (PMAY-G) hnuaiah kum 2016-2017 chhung atana target beneficiary 912 a?angin beneficiary 883 chu in sakna tur 2nd instalment pek fel tawh an ni.

Health department hnuaiah infant mortality rate (IMR) 14 niin, Mizorama district ti tha pathumna an ni.

He’ng bakah hian thingtlang khaw tin leh in tina eng pek hna thawh mek te, inkal pawhna kawng chungchang te, hriselna leh zirna lam te, thingtlang mite khawsak chawi kan nana hma lakna te, NSAP leh, BADP hnuaia ramri hnaih khuate tihchangtlun hna thawh chhoh mek chungchang te pawh he thut khawmah hian sawi ho a ni bawk.