No.679/2021-2022
Lawngtlai, Tomir thla ni 25, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. Mizoram puma total lockdown thawh thumna kalpui meka Lawngtlai District chhunga felfai zawka inkhuahkhirhna kalpui dan tur an sawi ho.

Chairman, Dr Andrew H. Vanlaldika chuan COVID-19 hri lengin kiam lam aia zual lam a pan zel avangin inthlahdah a rem lo tih sawiin, DLTF member leh COVID-19 dona leh venna kawnga hma latute chu theih tawp chhuah zel turin a ngen a. COVID-19 laka him tura fimkhurna tur inkaihhruaina hrang hrang leh sawrkarin dan a zamte thu awih taka zawm turin District mipuite a chah bawk.

DLTF Member Secretary, Lawngtlai District Chief Medical Officer Dr LP Malsawma chuan COVID-19 hri leng kaihhnawiha Lawngtlai District dinhmun tlangpui a tar lang a. COVID-19 positive-te enkawlna chungchangah mi 275 awm theihna Covid Care Centre (CCC), mi 230 awm theihna Community Covid Care Centre (4C) leh khum 5 awmna Dedicated Covid Health Centre (DCHC) te chu Lawngtlai District chhungah ruahman a nih thu a sawi a. Tun dinhmunah Lawngtlai District chhungah COVID-19 positive (active case) mi 100 an awm mek thu leh CCC, 4C leh Home Isolation-ah te enkawl an nih thu a sawi.

He DLTF thut khawmah hian COVID-19 hri leng tiziaawm tura hma lak dan tur leh lockdown vanga mipui harsatna hrang hrang sut kian dan tur zau taka sawi ho a ni a. Lockdown laia mipui chet vel chungchang te, dawr hawn chungchang te, lockdown chhunga chhuanchham an awm loh nana hma lak dan tur te, mipui ni tin mamawh lam khawm dan tur te, hmasawnna hna thawh leh chhiatna thleng palh thei ven nana hna thawh chungchang te sawi ho a ni.

Lockdown kalpui mek avanga chhungkaw harsatna tawkte puihna atan Chief Minister's Relief Fund for COVID-19 atangin Lawngtlai District chuan tun hnai khan Rs 2,50,000/- (cheng nuai hnih leh sing nga) a dawn thu DLTF meeting-ah hian tar lan a ni a. Hri leng dona kawnga tul hrang hranga hman atan tun hnaiah District Level Task Force on COVID-19 kutah tanpuina sum, Zoram Drivers Union (ZDU), Sub-Headquarters Lawngtlai atangin Rs 5,000/- (cheng sang nga), Ngurnunsangi English School Alumni (NESA) atangin Rs 1,00,000/- (cheng nuai khat) leh Officers' Club Lawngtlai (OCL) atangin Rs 1,10,000/- (cheng nuai khat leh sing khat) dawn a nih thu tar lan ni bawkin, chhuanchhamte leh mi harsate chhawmdawl nana tanpuina sum sem dan tur ruahmanna te tar lan a ni bawk.