No.1061/2021-2022 

Lawngtlai, Nikir thla ni 21, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga ni 21.06.2021 atanga ni 30.06.2021 inkar chhunga inkhuahkhirhna kalpui dan tur an rel.

Chairman, Dr Andrew H. Vanlaldika chuan Lawngtlai District-ah hri leng a darh loh nana inkhuahkhirhna kalpui a nih rualin, District mipuite'n ei leh bar kawnga harsatna an tawh loh nan leh chhuanchham an awm loh nan theih tawpa hma lak reng a nih thu a sawi a. Pawl, sawrkar hna thawk leh mimal atanga COVID-19 dona kaihhnawiha hman tur DLTF-a tanpuina lut eng emaw zat a awm tawh thu leh chumi hmang chuan mi harsate tanpui dan tur pawh a tul anga ruahman zel a nih thu sawiin, hri leng vanga inkhuahkhirhna kalpui karah mahni thenawmte leh tualchhunga harsatna tawkte chhawmdawl nan khawtlang, kohhran, tlawmngai pawl leh mimal eng emaw zat an che chhuak thin chu a lawmawmin, a thlamuanthlak hle a ni, a ti.

DLTF Member Secretary, Chief Medical Officer Dr LP Malsawma chuan COVID-19 hri leng kaihhnawiha Lawngtlai District dinhmun tlangpui a tar lang a. Tun dinhmunah Lawngtlai District chhungah COVID-19 positive (active case) mi 303 an awm mek thu leh CCC, 4C leh Home Isolation-ah te enkawl an nih thu a sawi.

He DLTF thut khawmah hian COVID-19 hri leng tiziaawm tura hma lak dan tur leh inkhuahkhirhna kalpui chhunzawm dan tur sawi ho a ni a. Lawngtlai District chhungah June ni 30, 2021 (Nilaini) zing dar 4:00 thleng chu kalphung tlema her rem hretin, inkhuahkhirhna kalpui leh rih ni se, tih a ni.

Chawlhkar liam taa dawr hawn dan chu tlema her danglam hretin, thlai hnah, chawhmeh leh ni tin mamawh (essential commodity) zawrhna bakah, dawr dang zawng zawng pawh tiamin chawlhkar khatah ni thum (Thawhtanni, Nilaini leh Zirtawpni-ah te) zing dar 5:00 atanga chawhnu dar 1:00 thleng an inhawn remtih a ni a. Inrinni chu Lawngtlai khawpui pawn lam atanga chakkhai mamawh lam turte tana serh hran niin, khawpui pawn atanga chakkhai lam turte hian VLTF hriatpuina an neih a ngai dawn a. Pawn lam atanga Lawngtlai khawpui chhunga chakkhai lam an fuan khawm tam lutuk loh nan, Ngengpuitlang piah lam leh Diltlang 'S' thlang lamte chu VLTF te'n a hlawma mipui chakkhai lamsak turin ruahmanna siam se, tih a ni.

Chawlhkar khata dawr hawn ni (ni thum)-a hun hawn chhung hian auto rickshaw leh taxi te chu an tlan phalsak a ni a. He'ng bazar ni-ah hian Bazar leh Chandmary huam chhung kawngpui dungah mimal lirthei hun phal a ni lo va, sumdawng lirthei te erawh an dinna ngaia din phalsak niin, bazar nia lirthei veivah dan tur hi police lamin ruahmanna siamin, an thunun dawn a ni.

Zirlaite lehkha zirna chungchangah zirna in khar chhunzawm a la nih rualin, an zirlaia harsatna tawkte tanpui leh zirtir turin in lama kal chilha zirtirtu bik (home tutor) lak phal a ni a. Tutor-te ina zirlaite'n an pan khawm erawh khap a ni thung.

Hemi inkhuahkhirhna hman hun chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tur a ni a. Sawrkar office-te chu lockdown hmasaa an kal dan pangngai angin, a pawimawh zual chauh office kai a, a bakin in lam atanga hna thawh chu kalpui chhunzawm ni se, tih a ni.

Hna thawh leh eizawnna thila ram kal/feh chungchang chu a pangngai angin, VLTF-te hriatpuina leh remtihna hmanga kalpui theih a ni a. Khawpui chhunga bungraw hlan emaw, hlan thlak emaw chu zan dar 8:00 leh zing dar 4:00 inkarah tih tur a ni.

State sawrkarin Mizoram puma inkhuahkhirhna thupek a chhuah, clause A.7.1 angin, "Hemi hun chhung hian eizawnna leh tul bik thil ni lova veivah leh inlen pawh khap tlat a ni" a. Eizawnna leh tul bik thila chhuah ngaite chuan mahni veng VLTF-te hriatpuina lehkha an lak zel a ngai dawn a. Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.

Lawngtlai District chhunga inkhuahkhirhna kalpui dan tur kimchang chu Deputy Commissioner-in a la tichhuak dawn a ni.