No.1463/2021-2022

Lawngtlai, Vawkhniahzawn thla ni 19, 2021: Vawiin khan Lawngtlai District Level Task Force on COVID-19 (DLTF) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga ni 24.07.2021 zanlai dar 12:00 thlenga inkhuahkhirhna kalpui dan tur an rel.

Chairman, Dr Andrew H. Vanlaldika chuan COVID-19 hri lengin kiam lam aia zual lam a la pan zel avangin COVID-19 laka Lawngtlai District a him theih nana kawng hrang hranga hma latu leh thawktute insan mar a, tan lak leh zual a tul thu a sawi a. Mipuite pawh sawrkar thu awih a, inkaihhruainate tha taka zawm chhunzawm zel turin a chah.

Lawngtlai DLTF thu khawm chuan Lawngtlai District chhungah uluk leh fimkhur zawka inkhuahkhirhna la kalpui a tul nia an hriat thu sawiin, Lawngtlai khawpui chhungah he inkhuahkhirhna kalpui chhung hian curfew puan chhunzawm an rel a. District chhung hmun dangah chuan Mizoram sawrkarin inkaihhruaina a chhuah zulzuiin inkhuahkhirhna kalpui a ni thung ang.

Lawngtlai khawpui chhunga curfew kalpui chhung hian dawr zawng zawng khar niin, phalna nei lova pawn chhuah khap a ni dawn a. Sawrkar office pawh loh theih lohva kal ngaite chauh an kal theih nan ruahmanna siam a ni ang.

Hemi chhung hian mipui tan bazar khar tura tih a ni a. Mamawh zual leh chhuanchham mai tur, ni tin ei chawp leh mamawh zualpui, loh theih lohva lam ngai neite chu mahni veng VLTF-ah inhriattirin, VLTF-te'n a tul angin ruahmanna an lo siamsak dawn a ni.

Bank chu mipui tan loh theih lohvah chauh dawr phal a ni dawn a. Lawngtlai khawpui chhung tan chawlhkar khatah ni thum leh Lawngtlai khawpui pawn lam tan chawlhkar khatah ni hnih bank dawrna hun hawn ni se, tih a ni.

MGNREGA hlawh lak dan turah DRDA Project Director-in ruahmanna lo siam se tih niin, COVID-19 laka him nan khaw hrang hrang tan hun bi felfai tak ruat ni se, tih a ni a. Ei rawng bawlna gas sem dan turah DCSO Lawngtlaiin ruahmanna lo siam se, tih a ni bawk.

Ei zawnna avanga ram kal/feh chungchangah, feh turte chuan zing dar 8:00 hmaa khawpui chhuahsanin, tlai dar 5:00 leh dar 6:00 inkarah haw leh theih a ni ang a. Feh tur reng reng hian VLTF-te hriatpuina leh remtihna an lak a ngai dawn a. Ei zawnna kaihhnawih ni lo va, intihhlim nana ram kal satliah chu khap a ni.

Hemi hun chhung hian chhiat ni that nia zawm tur inkaihhruaina chu khauh taka lekkawh tur a ni dawn a. Chhiat ni bika inkaihhruaina lek kawh chu Branch YLA leh police te kutah dah a ni.

Hemi inkhuahkhirhna hman hun chhung hian zan dar 7:00 atanga a tuk zing dar 4:00 thleng zan tin pawn chhuah khap bur (curfew) chu chhunzawm tur a ni bawk.

Hemi hun chhung hian Police, Executive Duty leh VLTF-te khauh taka duty-in, inkhuahkhirhna zawm lo leh COVID-19 laka himna tura sawrkarin dan a siamte bawhchhia chu dan angin an hrem zel dawn a ni.

Lawngtlai District chhunga inkhuahkhirhna kalpui dan tur kimchang chu Deputy Commissioner-in a la tichhuak dawn a ni.

Attachment

  • Loading attachment...