Vawiin khan Lawngtlai District Consultative Committee, District Level Review Committee leh District Level Security Committee chu an Chairman Lawngtlai DC Pu N. Chakhai MCS hovin DC Conference Hall-ah an thu khawm a. Lead Bank office, RBI representative, bank hrang hrang leh sawrkar official leh tlawmngai pawl ai awhte an tel.
He hunah hian kumin January atanga March thla chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hranga bank hma lak dan te sawi ho a ni bawk.
He thut khawmah hian Lawngtlaia ATM dah belh a tul thu te, sawrkar laipui hma lakna hrang hrangte bank nen thlun zawm zel a nih tawh avangin bank leh internet service tihchangtlun a tul thu te sawi lan niin, hemi kawnga hma la turin bank hrang hrangte chu ngen an ni a. Bank-te chuan khuahkhirh lutuk lovin mipuiah a tam thei ang ber loan pe se tih a ni a. Thir pawisa nawi (coin) thi tur anga sawi awm thin chu thu thang dik lo a nih thu leh mipui leh dawrkaite paw'n dawn hreh loh tur a nih thu pawh tarlan a ni bawk.
