Vawiin khan Lawngtlai District Consultative Committee, District Level Review Committee leh District Level Security Committee chu an Chairman Lawngtlai DC Pu N. Chakhai MCS hovin DC Conference Hall-ah an thu khawm a. Lead Bank office, RBI representative, NABARD representative, bank hrang hrang leh sawrkar official leh tlawmngai pawl ai awhte an tel.

He hunah hian nikum 2018 April atanga September  thla chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamthat nana sawrkar laipui ruahmanna hrang hrang - Stand-Up India, PMAY (Housing for All) leh Women Self Help Group lama bank hma lak dan te sawi ho a ni bawk.

He thut khawmah hian bank-te chuan khuahkhirh lutuk lovin mipuiah a tam thei ang ber loan pe se tih a ni a. CD ratio leh non priority loan chungchangah Lawngtlai District-a bank-te chuan an ti tha thawkhat a, agriculture kaihhnawih loan pek chhuah lamah erawh tan lak an ngaih thu sawi lan a ni a. Ar, vawk leh bawng vulhte tan NABARD hnuaiah 50% subsidy loan a awm thu te pawh tar lan niin, sawrkarin mipuite tana hamthatna a siamte mipuiin an hriata an chhawr tangkai theihna tura zau zawka puanzar thin ni se, tih a ni.