No.345/2021-2022

Lawngtlai, Tomir thla ni 1, 2021: Nimin khan Lawngtlai District Forest Fire Prevention Task Force chu an Chairman, Lawngtlai Bawrhsap Dr Andrew H. Vanlaldika hovin a pisaah an thu khawm.

He thut khawmah hian Lawngtlai District chhunga kangmei chhuak avanga chhiatna hrang hrang thlen dan thlir let niin, khaw kheng zui zel thei chungchangah kangmei laka inven dan tur kawng hrang hrang sawi ho a ni bawk.

Phawngpui National Park (PNP)-a kangmei luh dan leh tuna a dinhmun chungchangah LDFFPTF Member Secretary Pu Samson Thanruma, Deputy Conservator of Forests (Wildlife) chuan report a pe a. National Park chhunga kangmei lut hi April ni 25, 2021-a South Lungpher ram kang atanga intan a nih thu sawiin, PNP area tana hlauhawm zualpui chu a ziaawm thu leh, report pek hun lai thlengin PNP area chu hectare 10 atanga hectare 15 vela zau a kan thu a sawi a. National Park huam chin atangin kangmei hi hnuai lamah a tawlh chhuak tih sawiin, National Park-a a lut zel tur hi Siachangkawn khawtlang, VC leh YLA te'n an khaw tui lakna hnarah dan chah tuma an beih mek thu a sawi a ni.

He hunah hian Bungtlang 'S' khuain chhiat an tawh chungchanga sawrkar hma lakna leh tlawmngai pawlte hma lakna pawh thlir let a ni a. Kangmei chhuak avanga chhiatna awm tawhte zir chian a, a chhan chhui chian ni se, tia rel a ni bawk.

Meeting chuan Lawngtlai District chhunga Block hrang hranga kangmei chhuakin chhiatna a thlen dan zirchiangtu tur Block Level Investigation Committee chu BDO chairman-na hnuaiah din tha a ti a. Block Level Committee hian an huam chhunga kangmei avanga chhiat tawh dan leh nghawng a neih dan te an zir chiang dawn a ni.

Vawiin meeting-ah hian hun lo la awm tur atana kangmei laka inven dan tur te, mipuite hnena zirtirna pek dan tur te, ramngaw chereu zel ven dan tur leh, dan lova thingzai chevel titlem tura hma lak dan tur kawng hrang hrangte an sawi ho bawk a ni.