Vawiin khan Lawngtlai District Level Committee on Fire Prevention (DLCFP) chu DC Conference Hall-ah an thu khawm a. Kangmei ven kawnga hma lak dan tur hrang hrang an sawi ho.

He thut khawm hi senior member, Govt Lawngtlai College Principal Pu T. Thangthuama chuan kaihruaiin, ram kangin pawi a thlen thui theihzia  leh a venna kawnga tan lak a ngaihzia a sawi a. Member Secretary, Lawngtlai DCF Pu PC Lalchhandama hnen atangin kum hmasa lama hma lak dan report ngaihthlak a ni a. Kumina hma lakna tur hrang hrang zingah, Fire Prevention Week 2018 hawnna chu February ni 12-ah DC Conference Hall-ah neih ni se, tih a ni a. Hemi atan hian programme pawh ruahman nghal a ni a. Ram kang tur ven nana mei dai phiah te, State Level Committee-in lo hal theih hun chhung a bituk March ni 15 chu zawm ve tura District Council thuneitute ngen leh kangmei ven chungchanga mipui zirtirna a tam thei ang bera puangzar tura zirna in, VC, NGO leh media lam ngen te pawh rel a ni.

Kangmei ven kawnga thawk tha khuate chawimawina "Village Level Fire Prevention Award 2018" chu kumin pawh hian siam a ni leh dawn a. Kangmei chhuak thelhnaa nunna chan an awm chuan zangnadawmna ngaihtuahsak an ni bawk ang.