Vawiin khan Nehru Yuva Kendra (NYK), Lawngtlai hnuaia Youth Development Association (YDA) buatsaihin Lawngtlaia CYLA Hall-ah Lawngtlai District Level Cultural Festival (solo competition) neih a ni a. Lelte Weekly Editor Pu C.Dinthanga chu Khuallian a ni.

Khuallian Pu C.Dinthanga chuan zai chu eizawnna tlak leh sum lakluh theihna tha tak a nih thu sawiin, Mizorama zaithiamte'n hamthatna an hmuh belh zel thu a sawi a. Lawngtlai District atangin mi talent nei tha tak tak an lo chhuak tawh a, talent hai chhuah tur tam tak a la awm ngei pawh a rin thu sawiin, tuna zai intihsiak neih tur pawh hian rah tha tak a chhuah a beisei thu a sawi.

He hun hi YDA Secretary Nl K.Lalhmachhuani, Multi-Tasking Staff, NYK chuan a kaihruai a. YDA President Pu K.Vanhmingliana, NYV i/c Bungtlang Block chuan inlawmna thu sawiin, BCM Lawngtlai Area Executive Secretary Rev. R.Lalbiakliana'n hunserh a hmang a. NYK District Youth Coordinator Pi Mercy Sellate chuan a khuh hawnna thu a sawi bakah, CYLA General Secretary Pu LH Ramdingliana leh World Vision (CADP) Coordinator Pu HL Rinawma te pawhin thu an sawi a. Zaithiam Lalenkawli Pautu, Esther LD Hrahsel leh Vanlalhriatpuii te an zai bakah, Chawnhu Branch YLA te'n hnam lam an entir bawk.

He hunah hian thalai pawl hna thawk tha Chawnhu Branch YLA hnenah district level Outstanding Youth Club Award hlan a ni a. He award hian certificate leh Rs 25,000/- a keng tel a ni.

Zai intihsiakah hian YLA Sub-Headquarters leh Branch ai awhin mi pariat an tel a. Hla pahnih - Lai hla leh Mizo/English hla hmanga inelin, N.Lalhmangaihropuii, Bungtlang S chu pakhatna a ni a; pahnihna KC Remruatpuia, Bethel Veng, Lawngtlai niin, pathumna Melody Kumsangmawii Chhangte, Chandmary, Lawngtlai a ni a. He intihsiaka pakhatna atanga pathumna thleng hian citation leh trophy an dawn bakah, All India Radio, Lungleiah contract an nei nghal dawn a. NYK hian la buaipui chhoh zel an tum bawk a ni. Pakhatna bik hi Lelte Award 2017-ah chi bil award zinga Lai hla huangah award dawng tura thlan nghal a ni bawk.