No.2286/2021-2022
Aizawl Mimkut thla ni 20, 2021: Vawiin khan Lawngtlai District Level Fisheries Conservation Board (DLFCB) chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm.

Chairman Dr Andrew H. Vanlaldika chuan lui dung leh luia sangha leh nungcha dangte humhalh a tulzia sawiin, lui leh a chhunga nungchate an enkawl dan chu mi dangin a chhehvela mi chengte an tehna pakhat a nih thu a sawi a. Lui leh luia cheng nungchate chuan mihringte tan pawimawhna thuk tak an neih avangin a enkawl kawngah District mipuite kan harh thar a, tihchereu a nih mai loh nana humhalh nachang kan hriat zel a pawimawh a ni, a ti.

Lawngtlai DLFCB Member Secretary, District Fisheries Development Officer Pi Lalremsangpuii chuan Board hma lakna report pein, hmachhawp tlangpui a sawi fiah a. Member kal khawmte chuan lui humhalh chungchanga hma lak mek dan thlir hovin, hma lak zel dan tura rawtna awmte an sawi ho a ni.

Vawiina Lawngtlai DLFCB thu khawm chuan nghafuan hun a nih chhoh leh dawn tak avangin Lawngtlai District chhungah nghafuan humhalh a nih theih nan hma lak an rel a. Hemi atan hian Lai Autonomous District Council leh Chakma Autonomous District Council-a a kaihhnawih official-te leh tlawmngai pawlte nen hma lak ho theih dan tur sawi hova inrawn tlan ni se, tih a ni.