No.48/2020-2021

Vawiin khan Lawngtlai District Level Task Force on COVID-19 chu an Chairman Pi Shashanka Ala, IAS hovin DC Conference Hall-ah an thu khawm a. Inkharkhip kalpui tawh dan thlir letin, hma lak zui zel dan tur an sawi ho.

Bawrhsap chuan COVID-19 ral beihna kawnga theih tawp chhuaha hma latu medical, police leh essential service petu department hrang hrang te, tlawmngaia thahnem ngai taka thawktu Central YLA leh khua/veng tina task force te chungah lawm thu a sawi a. District himna atan theih tawp chhuah chhunzawm turin a chah hlawm.

He thut khawmah hian Lawngtlai khawpui chhung veng hrang hranga task force ai awhte pawh telin, mipui ni tin mamawh pek chungchangah harsatna a la awm loh thu tar lan a ni a. District chhung mipuite'n an mamawh rualkhai taka an chan theih nan uluk leh zuala vil ni se, tih a ni.

Hriattirna chhuah tawh angin, mipui ni tin mamawh phurtu lirtheite chu an tawpna tur hmun an thlen hma chu lo tihdin loh tur a nih thu leh, hei hi mipui mamawh phurtute harsatna tawh thin tihkianna tur a nih bakah, tul lova mahni dinhmun tihderthawn lohna tur a nih thu inhrilh nawn a ni a. Veng chhunga duty-te chu mi lo tiding a, tul lova harsatna siamtu ni lovin, a mamawhte puitu tur an ni a, chuti ang tak chuan hma la tura beisei an ni a, hmun khatah mi pahnih aia tam awm lo turin ngen an ni. Feh tur reng reng lo dan loh tur a nih thu leh, silai leh thang kenga ram vah leh lui kal erawh phal a nih loh thu sawi nawn a ni a. Tun boruakah mi in luahtu, in luah man pe thei lo an awm paw'n inhnawh chhuah loh tur a nih thu sawi lan a ni bawk.

Inkharkhip chu a ngai anga la kalpui zui zel tur a ni a, duty-te leh mipuite inthlahdah mai lo turin DLTF chuan a ngen a. Facility leh home quarantine te'n fimkhur taka lo chhunzawm tur te, mipui pawh pawn chhuak lo tur te, kut sil fai ngai pawimawh zel tur leh chi-ai lo turin a ngen bawk.