No.3963/2021-2022

Aizawl Ramtuk thla ni 10, 2022: Mizoram Journalists' Association (MJA) Golden Jubilee lawmna kal zelah vawiin khan MJA Lawngtlai District huaihawtin Lai Autonomous District Council (LADC)-a department hotu (Head of Department)-te tan LADC Conference Hall-ah media hman chungchang inzirtirna (media awareness programme) buatsaih a ni.

He huna Khuallian, LADC-a Executive Secretary Pu H. Lalramenga chuan kum 2022 chu MJA Golden Jubilee a nih ang bawkin LADC Golden Jubilee pawh a ni ve tih sawiin, District MJA te'n media awareness programme an buatsaih chu MJA leh LADC tan hun pawimawh bik chhinchhiahna tha tak nia a hriat thu a sawi a. Chanchinbu leh media hrang hrang chu mipui vantlang leh sawrkar inkara palai hna thawktu an ni a, sawrkar hna thawkte'n chhawr tangkai thiam a pawimawh a ni, a ti a. LADC-ah chuan Information & Public Relations (I&PR) Department-ah advertisement fund dah niin, HoD-te'n a hranpaa advertisement chhuahna tur sum an nei lo a nih pawhin I&PR Department kal tlanga advertisement chhuah nachang hre thin turin a chah a ni.

LADC-a HoD-te tana media awareness programme buatsaih hi District MJA General Secretary Pu Lalchharliana'n a kaihruai a. Vice President Pu Elvis Lalthangzuala'n inlawmna thu sawiin, resource person Lawngtlai District Information & Public Relations Officer Pu C. Lalhruaitluanga'n "Sawrkar leh mipui rawngbawlnaah media" tih thupui hmangin thu a sawi a. Sawi hona hun hlawk tak hman zui niin, LADC-a I&PRO Pu HC Vanlalruatpuia'n programme-a telte hnenah certificate a hlan a. District MJA President Pu Lalngheta Ralte chuan tlipna thu sawiin hun a khar a ni.

MJA Golden Jubilee lawmna pual hian Lawngtlai District MJA chuan January ni 7, 2022 khan jubilee mei an det a. January ni 28, 2022 khan annual conference hmangin, vawiina LADC HoD-te tana media awareness programme an buatsaih bakah hian, February ni 24, 2022 khian Lawngtlaia state sawrkar department hrang hrang head of office-te tan media awareness programme hi buatsaih leh turin ruahmanna an siam a ni.