341/2022-2023

Ṭau thla ni 28, 2022: Vawiin khan Lawngtlai District Skill Committee chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an ṭhu khawm a. SANKALP (Skill Acquisition and Knowledge Awareness for Livelihood Promotion) hnuaia District chhunga zirlaite, ṭhalaite leh kut hna thawktute thiamna tihpun nana skill upgradation training buatsaih chungchang an sawi ho.

Chairman Dr Andrew H. Vanlaldika chuan hna thawh leh ei zawnna mila thiam thil chhawr tlak leh chhenfakawm inzirtirna leh inkawhhmuhna (skill training) buatsaih chu thil pawimawh tak a nih thu a sawi a. Mahni department zawnah District ṭhalaite leh kut hna thawktute tana skill training buatsaih tur ruahmanna ṭha tak duang turin DSC member kal khawmte chu a chah a ni.

Pu Sudhanshu Gangwar, MGNF Fellow chuan SANKALP hnuaia skill training buatsaih tura sawrkar laipui ruahmanna a sawi fiah a. Department hrang hrang hnuaia training ruahman dan tur te sawi ho a ni.

SANKALP hnuaiah hian India rama district hnufual leh ngaihven ngai bik (aspirational/backward district) 35 thlan chhuahah te skill development training kalpuina tur ruahmanna (proposal) cheng nuai 200 hu siam theih a ni a. District 35 zingah hian Lawngtlai District pawh telin, ruahmanna siam duh tur department hrang hrangte'n May chawlhkar khatna chhungin DSC-ah proposal theh lutin, a ṭul anga thlitfim a nih hnuah sawrkar laipui Ministry of Skill Development and Entrepreneurship lamah theh luh ni se, tih a ni.

Attachment

  • Loading attachment...