No.4015/2021-2022
Aizawl, the 16th February 2022: Vawiin khan Labour Employment, Skill Development & Entrepreneurship (LESDE) Department huaihawtin Lawngtlai DC Conference Hall-ah Lawngtlai District Skill Committee member-te tan SANKALP hnuaia District thalaite thiamna tihpun kawnga hma lak dan tur zir hona, "sensitisation programme for skill upgradation under SANKALP" buatsaih a ni.
He hun hmanpuitu DSC Chairman, Lawngtlai Bawrhsap Dr Andrew H. Vanlaldika chuan Lawngtlai District thalaite'n mahni intodelh thei tur leh District hmasawnna kawnga thawk tura thiamna chhawr tlak leh chhenfakawm an neih theih nan thiam thil zirtirna leh kawhhmuhna chu hma lakna pawimawh tak a nih thu a sawi a. Mahni kutkawih thiam thil nei tur leh sumdawnna hma thar la thei tura District thalaite chher chhuah zel an nih theih nan ngaihtuahna seng a, hma la turin DSC member kal khawmte chu a chah a ni.
He hun hi Lawngtlai Sub-Deputy Commissioner Pu H. Vanlalbiakzauva'n a kaihruai a. SANKALP (Skill Acquisition and Knowledge Awareness for Livelihood Promotion)-a Assistant Mission Director Pi Zohlupuii leh Pu Lalruatsanga, ITI Specialist te'n SANKALP leh Craftsmen Training Scheme chungchangah zirtirna an pe a. Pu Alan Lalremruata, Centre Manager, Divine Skill Training Centre chuan training petute chungchang bakah, PMKVY leh programme danga training an kalpui dan a sawi fiah a. Pu Sudhanshu Gangwar, MGNF Fellow hnen atangin Lawngtlai District Skill Development Plan chungchang report ngaihthlak a ni bawk.
He hunah hian zawhna leh chhanna leh sawi hona hun hman zui niin, skill development chungchanga Lawngtlai District-a hma lak zel dan tur sawi ho a ni bawk.
Attachment
- Loading attachment...
