No.2119/2021-2022

Aizawl Mimkut thla ni 3, 2021: COVID-19 hri leng mekah Lawngtlai District chhungah hri kai thar an pun zel avangin ruahmanna thar kalpui zel a ni a. Vawiin chawhnu khan Lawngtlai Bawrhsap Dr Andrew H. Vanlaldika hovin District thuneitute leh health department hotute chuan Lawngtlaia Covid Care Centre (CCC) siam belhna tur hmunhma enfiahin, tuna CCC-a enkawl mekte'n awlsam zawka damdawi leh chakkhai an lam theihna tur an ruahman nghal bawk.

Lawngtlai Bawrhsap ho hian Thingkah rama 3rd IR Batallion hmun tur sak thara CCC buatsaih chu hri kai an pun chhoh zel pawha buatsaih belh dan tur enfiah niin, mi 100 vel len theihna tur building dang chu a tul thuta hman mai theih turin ruahman ni se, tih a ni a. A tul angin DC office lam leh Power & Electricity leh PHE Department te'n lo bawhzui se, tih a ni.

Lawngtlaia hri kai enkawlna CCC hi khaw pawna awm a nih avangin, hri kai enkawl mekte tan damdawi leh mamawh dang lamna a buaithlakin, harsatna an tawh chang a awm thin a. Hemi harsatna sut kian nan hian, 3rd IR hmun tura in sak sa, CCC hnaiha awm pakhat chu damdawi leh ei tur lam chi zawrh nan hman ni se, tih a ni a. Health department lamin chakkhai mamawh zualpui dangte nena damdawi zuar thei tur a rang lamin lo ngaihven se, tih a ni.

Vawiina CCC buatsaih belhna tur ennaah hian Lawngtlai Bawrhsap bakah hian, Additional Deputy Commissioner Pi Marilyn Rualzakhumthangi, Chief Medical Officer Dr LP Malsawma leh Senior Medical Officer Dr S. Thaizi te an tel a ni.

Attachment

  • Loading attachment...